മണിച്ചിത്രത്താഴിന്റെ ആ ക്ലൈമാസ്‌ക് സുരേഷ് ഗോപിയുടെ ആശയം; വെളിപ്പെടുത്തി ബി ഉണ്ണികൃഷ്ണന്‍-ഇത്രയും ക്രിയേറ്റിവിറ്റി ഉള്ളയാള്‍ ആയിരുന്നോയെന്ന് സുരേഷ് ഗോപിയോട് ആരാധകര്‍

മലയാളത്തിലെ എക്കാലത്തേയും ഹിറ്റ് ചിത്രങ്ങളില്‍ ഒന്നാണ് മണിച്ചിത്രത്താഴ്. മോഹന്‍ലാല്‍, സുരേഷ് ഗോപി, ശോഭന എന്നിവര്‍ കേന്ദ്ര കഥാപാത്രമായി എത്തിയ ചിത്രം സംവിധാനം ചെയ്തത് ഫാസില്‍ ആയിരുന്നു. വന്‍ ഹിറ്റായിരുന്ന ചിത്രം തമിഴിലേക്കും ബോളിവുഡിലേക്കും റിമേക്ക് ചെയ്തിരുന്നു. ഇവിടെയും ചിത്രം വിജയം സ്വന്തമാക്കിയിരുന്നു.

മണിച്ചിത്രത്താഴ് കണ്ടവര്‍ ആരും തന്നെ സിനിമയുടെ ക്ലൈമാക്‌സ് മറക്കാന്‍ സാധ്യതയില്ല. സുരേഷ് ഗോപിയുടെ രാജാവ് കഥാപാത്രത്തിനെ കൊന്ന് നാഗവല്ലി ഒഴിഞ്ഞ് പോകുന്ന രംഗത്തിന് ഇന്നും ആരാധകരുണ്ട്. ഇപ്പോഴിത ഈ രംഗത്തിന്റെ ആശയം സുരേഷ് ഗോപിയുടെത് ആയിരുന്നുവെന്ന് വെളിപ്പെടുത്തിയിരിക്കുകയാണ് സംവിധായകന്‍ ബി ഉണ്ണികൃഷ്ണന്‍.

കഴിഞ്ഞ ദിവസം നടന്ന വാര്‍ത്ത സമ്മേളനത്തിന് ഇടയില്‍ ആയിരുന്നു ബി ഉണ്ണികൃഷ്ണന്‍ ഇക്കാര്യം പറഞ്ഞത്. മണിച്ചിത്രത്താഴ്’ സിനിമയുടെ ക്ലൈമാക്‌സ് ആശയം സംവിധായകന്‍ ഫാസിലിനു ലഭിച്ചത് സുരേഷ് ഗോപിയില്‍ നിന്നുമാണ്. ക്ലൈമാക്‌സ് എങ്ങനെ ചെയ്യുമെന്ന് ആശയ കുഴപ്പത്തിലായിരുന്ന സംവിധായകന്‍ ഫാസിലിനോടും അണിയറ പ്രവര്‍ത്തകരോടും ഒരു ഡമ്മിയെ വച്ച് ക്ലൈമാക്‌സ് ഷൂട്ട് ചെയ്യാം എന്ന് പറഞ്ഞത് സുരേഷ് ഗോപി ആയിരുന്നു.

ആ നിര്‍ദ്ദേശം ഫാസില്‍ വളരെ സന്തോഷത്തോടെ സ്വീകരിക്കുകയും അങ്ങനെ ക്ലൈമാക്‌സ് എങ്ങനെ ചെയ്യും എന്നുള്ള ആശയക്കുഴപ്പത്തിന് പരിഹാരം ഉണ്ടാവുകയും ചെയ്തു എന്നാണ് ബി ഉണ്ണികൃഷ്ണന്‍ പറയുന്നത്.

മധു മുട്ടത്തിന്റെ തിരക്കഥ അടിസ്ഥാനപ്പെടുത്തി ഫാസില്‍ സംവിധാനം ചെയ്ത ചിത്രമാണ് മണിച്ചിത്രത്താഴ്. മോഹന്‍ലാല്‍, സുരേഷ് ഗോപി, ശോഭന എന്നിവരെ കൂടാതെ കുതിരവട്ടം പപ്പു, ഇന്നസെന്റ്, തിലകന്‍,കെപിഎസി ലളിത, ഗണേഷ് കുമാര്‍ തുടങ്ങി വന്‍ താരനിര ചിത്രത്തില്‍ അണിനിരന്നിരുന്നു.