മകളുടെ കുഞ്ഞിനെ കണ്ടു കുറച്ചു കഴിഞ്ഞപ്പോള്‍ തന്നെ അപ്പച്ചന്‍ യാത്രയായി; ലാല്‍ജോസ് പറയുന്നു

എന്നും ഓര്‍ത്തിരിക്കാന്‍ കഴിയുന്ന ഒത്തിരി നല്ല സിനിമകള്‍ മലയാളികള്‍ക്ക് സമ്മാനിച്ച സംവിധായകനാണ് ലാല്‍ ജോസ്. തന്റെ കുടുംബ വിശേഷങ്ങള്‍ക്ക് പങ്കുവെച്ച് ലാല്‍ ജോസ് എത്താറുണ്ട്. അതുപോലെ തനിക്ക് ഏറെ പ്രിയപ്പെട്ട ഒരാളാണ് അപ്പനെന്ന് ലാല്‍ ജോസ് പറഞ്ഞിട്ടുണ്ട്. അഭിമുഖങ്ങളിലും അപ്പനെ കുറിച്ച് ലാല്‍ ജോസ് സംസാരിച്ചു. ഇപ്പോഴിതാ അപ്പനെ കുറിച്ച് സംവിധായകന്‍ പറഞ്ഞ വാക്കുകള്‍ ആണ് ശ്രദ്ധ നേടുന്നത്. അവസാനത്തെ 20 ദിവസം അപ്പന്‍ ആശുപത്രിയിലായിരുന്നു എന്ന് അദ്ദേഹം പറയുന്നു.

അപ്പന്‍ ആശുപത്രിയില്‍ ഉള്ള സമയത്ത് താന്‍ സോളമിന്റെ തേനീച്ചകളുടെ ഷൂട്ടിംഗ് തിരക്കിലായിരുന്നു. ആ സമയത്ത് അനിയനും പെങ്ങളും ആയിരുന്നു ആശുപത്രിയില്‍ ഉണ്ടായിരുന്നത്. എന്നാല്‍ അപ്പന്‍ കുറച്ച് വീക്കായി തുടങ്ങിയ സമയത്ത് എന്നോട് പേഴ്‌സണലായി സംസാരിച്ചു. എനിക്ക് എന്തെങ്കിലും സംഭവിച്ചാല്‍ സഹോദരങ്ങളെ നീ സംരക്ഷിക്കണമെന്ന് അപ്പന്‍ പറഞ്ഞു.

നല്ല രസമാണ് ഞങ്ങളുടെ റിലേഷന്‍. ചുണ്ട് അനക്കാതെയാണ് ഞാന്‍ സംസാരിക്കുന്നത് എന്ന് അപ്പന്‍ പറഞ്ഞു കളിയാക്കുമായിരുന്നു. പഠിക്കുന്ന സമയത്ത് എന്നും രാവിലെ പത്രം വായിപ്പിക്കും. അധ്യാപകനായിരുന്ന സമയത്ത് അപ്പച്ചന്‍ മദ്യം കഴിക്കില്ല. റിട്ടയര്‍ ആയതിനുശേഷം ആണ് മദ്യപാനം തുടങ്ങിയത്. 10 വര്‍ഷം മുമ്പ് ഒരു കിഡ്‌നി പ്രശ്‌നം വന്നിരുന്നു. 10 ദിവസത്തില്‍ കൂടുതല്‍ ജീവിക്കില്ലെന്ന് അന്ന് പറഞ്ഞത്, അവിടുന്ന് രക്ഷപ്പെട്ടാണ്.

എന്റെ മൂത്ത മകളുടെ കുഞ്ഞിനെ കണ്ടിട്ടെ അപ്പച്ചന്‍ പോവാകു എന്ന് ഞാന്‍ പ്രാര്‍ത്ഥിക്കാറുണ്ടായിരുന്നു. മാത്തുണ്ടായത് ഡിസംബര്‍ 17ന് , ആ സമയത്ത് അപ്പച്ചന്‍ ആശുപത്രിയിലായിരുന്നു.

ഞാന്‍ വീഡിയോ ഒക്കെ കാണിക്കുമായിരുന്നു. കുഴപ്പമില്ല, ഇനി വീട്ടിലേക്ക് കൊണ്ടുപോയിക്കോളൂ എന്ന് പറഞ്ഞിരുന്നു. വീട്ടില്‍ വന്ന സമയത്ത് മോള്‍ കുഞ്ഞിനെ എടുത്ത് അപ്പച്ചനെ കാണിച്ചിരുന്നു. മാത്തുവെന്നാണ് പേരിടുന്നതെന്ന് പറഞ്ഞിരുന്നു. അപ്പന്റെ അപ്പന്റെ പേരും മാത്തുവെന്നാണ്, അത് കേട്ട് ഒന്ന് ചിരിച്ചു. ഞങ്ങള്‍ ഭക്ഷണം കഴിക്കാനായി ഒന്ന് മാറിയ സമയത്താണ് അപ്പച്ചന്‍ പോയത്. വീട്ടില്‍ വന്ന് മൂന്ന് മണിക്കൂര്‍ കഴിഞ്ഞപ്പോഴായിരുന്നു മരണം. എന്റെ ഒരു പ്രാര്‍ത്ഥനയുണ്ടായിരുന്നു. അതിന് വേണ്ടി അപ്പച്ചന്‍ വീട്ടിലേക്ക് വന്നത് പോലെയായാണ് എനിക്ക് തോന്നിയത് ലാല്‍ ജോസ് പറഞ്ഞു.