കുഞ്ചാക്കോ ബോബൻ്റെ ഫോട്ടോ വിറ്റ് ഒരാൾ വീട് പണിതിട്ടുണ്ട്, അമ്പരപ്പിക്കുന്ന രഹസ്യവുമായി രമേശ് പിഷാരടി

അടുത്ത സുഹൃത്തുക്കൾ ആണ് രമേശ് പിഷാരടിയും കുഞ്ചാക്കോ ബോബനും. ഇവർ രണ്ടു പേരും മാത്രമല്ല ഇരുവരുടെ കുടുംബങ്ങളും അങ്ങനെ തന്നെയാണ്. ഇപ്പോഴിതാ താരത്തെ കുറിച്ചുള്ള ഒരു രഹസ്യം പുറത്തു വിടുകയാണ് പിഷാരടി. തങ്ങളുടെ പുതിയ ചിത്രത്തിൻറെ പ്രമോഷനുമായി ബന്ധപ്പെട്ട് അഭിമുഖത്തിൽ സംസാരിക്കുകയായിരുന്നു ഇവർ.

സത്യം പറഞ്ഞാൽ എനിക്ക് ചാക്കോച്ചനോട് കട്ട അസൂയയായിരുന്നു. എൻറെ കോളേജിലെ പെൺകുട്ടികൾ മിക്കവരും ചാക്കോച്ചൻറെ ഫോട്ടോയുള്ള ഓട്ടോഗ്രാഫ് നോട്ട്ബുക്കും എല്ലാമാണ് കൊണ്ടു നടന്നിരുന്നത്. എൻറെ ചേച്ചി മൂപ്പരുടെ ഫോട്ടോ വാങ്ങാൻ വീട്ടിൽ നിന്നും പൈസ മേടിച്ചു കൊണ്ടു പോയിട്ടുണ്ട്. ചാക്കോച്ചൻറെ ഫോട്ടോ വിറ്റ് മാത്രം ഒരു സ്റ്റുഡിയോകാരൻ വീട് വെക്കുന്ന അവസ്ഥയും ഞാൻ കണ്ടിട്ടുണ്ട് – പിഷാരടി പറയുന്നു.

പഞ്ച വർണ്ണ തത്തയിൽ ചാക്കോച്ചൻ ഓടി വരുമ്പോൾ പാത്രം മുഖത്തെറിയുന്ന ഒരു സീനുണ്ട്. കുറെ ടേക്കുകൾ എടുത്തിട്ടും ആ സീൻ ശരിയായില്ല. അവസാനം മണിയൻ പിള്ള ചേട്ടൻ പറഞ്ഞത് അനുസരിച്ച് അതിൽ ചെറിയൊരു കഷ്ണം വെയിറ്റ് വെച്ചിട്ട് എറിയാൻ തീരുമാനിച്ചു. ശരിക്കും പറഞ്ഞാൽ എറിയാൻ നേരത്തെ മനസ്സൊന്നു പാളി, കാരണം ഈ മുഖം ആണല്ലോ പണ്ട് അസൂയയോടെ നോക്കിയിരുന്നത്. പിന്നെ നിയന്ത്രിച്ചാണ് എറിഞ്ഞത്. പിഷാരടി കൂട്ടിച്ചേർത്തു.

വിജയ് സൂപ്പറും പൗർണമിക്കും ശേഷം ജിസ് ജോയ് സംവിധാനം ചെയ്യുന്ന ചിത്രമാണ് മോഹൻകുമാർ ഫാൻസ്. നാളെയാണ് ചിത്രത്തിൻറെ റിലീസ്. സിനിമയ്ക്കുള്ളിലെ സിനിമക്കാരുടെ ജീവിതം പറയുന്ന ചിത്രമാണിത്. കുഞ്ചാക്കോ ബോബനും രമേശ് പിഷാരടിക്കും പുറമേ സിദ്ദിഖ്, ആസിഫലി, കെപിഎസി ലളിത, ശ്രീനിവാസൻ, മുകേഷ്, തുടങ്ങിയ പ്രമുഖരും അണി നിരക്കുന്നുണ്ട്. ബോബി സഞ്ജയ് ആണ് ചിത്രത്തിൻറെ തിരക്കഥ ഒരുക്കിയിരിക്കുന്നത്.