മാതാപിതാക്കളെ വിവരങ്ങള്‍ എടുക്കാന്‍ സ്റ്റേഷനിലേക്ക് വിളിപ്പിക്കരുത്, പ്രതികളെ കണ്ട് പിടിക്കാനാണ് പൊലീസ് ശ്രമിക്കേണ്ടത്; വിമര്‍ശനവുമായി യുനൈറ്റഡ് നഴ്‌സസ് അസോസിയേഷന്‍ ദേശീയ പ്രസിഡന്റ് ജാസ്മിന്‍ ഷാ

കൊല്ലം: കൊല്ലത്ത് ആറു വയസ്സുകാരിയെ തട്ടിക്കൊണ്ടുപോയ കേസില്‍ കുട്ടിയുടെ അച്ഛനെതിരായ അന്വേഷണത്തെ രൂക്ഷമായി വിമര്‍ശിച്ച് യുനൈറ്റഡ് നഴ്‌സസ് അസോസിയേഷന്‍ ദേശീയ പ്രസിഡന്റ് ജാസ്മിന്‍ ഷാ.

മാതാപിതാക്കളെ വിവരങ്ങള്‍ എടുക്കാന്‍ സ്റ്റേഷനിലേക്ക് വിളിപ്പിക്കരുതെന്ന് ജാസ്മിന്‍ ഷാ ആവശ്യപ്പെട്ടു.പ്രതികളെ കണ്ട് പിടിക്കാനാണ് പൊലീസ് ശ്രമിക്കേണ്ടത്. വിഷയത്തില്‍ കോടതി വഴി സംഘടന മുന്നോട് പോകും എന്നും ജാസ്മിന്‍ ഷാ പറഞ്ഞു.

യുഎന്‍എക്കെതിരായ ആരോപണം നേരിടുമെന്നും സംഘടനയ്ക്ക് റിക്രൂട്ടിങ് ഏജന്‍സിയില്ലെന്നും ജാസ്മിന്‍ ഷാ കൂട്ടിച്ചേര്‍ത്തു. അതേസമയം ആറ് വയസ്സുകാരിയെ തട്ടിക്കൊണ്ട് പോയ കേസില്‍ പിതാവ് താമസിച്ചിരുന്ന വീട്ടില്‍ പരിശോധന നടത്തിയതിന് പിന്നാലെ പ്രതികരണവുമായി ആറ് വയസ്സുകാരിയുടെ പിതാവ് റെജി എത്തിയിരുന്നു.

മകളെ തട്ടിക്കൊണ്ടുപോയ കേസില്‍ തന്നെ അന്വേഷണ സംഘം ചോദ്യം ചെയ്യാന്‍ വിളിപ്പിച്ചെന്നും അവരുടെ മുമ്പാകെ ഹാജരാകുമെന്നും റെജി പറഞ്ഞു.

പത്തനംതിട്ടയില്‍ നിന്നും മൊബൈല്‍ കണ്ടെടുത്തതിനെ കുറിച്ചും റെജി പ്രതികരിച്ചു. പത്തനംതിട്ടയിലെ താമസസ്ഥലത്ത് നിന്ന് കൊണ്ടുപോയത് താന്‍ ഉപയോഗിച്ചിരുന്ന പഴയ ഫോണാണ്.

കുട്ടികള്‍ ഉപയോഗിക്കാതിരിക്കാന്‍ വേണ്ടിയാണ് ആ ഫോണ്‍ കൊല്ലം ഓയൂരിലെ വീട്ടില്‍ നിന്ന് മാറ്റിവച്ചത് എന്നും റെജി പറഞ്ഞു.

ഏത് പരിശോധനയും നടത്തിക്കോട്ടെ. എന്തെങ്കിലും തെളിവുണ്ടെങ്കില്‍ പൊലീസ് അത് കണ്ടെത്തട്ടെയെന്നും റെജി പറഞ്ഞു.

അതേസമയം തട്ടിക്കൊണ്ടുപോകല്‍ കേസില്‍ തന്നെയും താന്‍ നേതൃത്വം കൊടുക്കുന്ന യുണൈറ്റഡ് നഴ്സസ് അസോസിയേഷനെയും ലക്ഷ്യം വയ്ക്കുകയാണെന്നും അദ്ദേഹം കുറ്റപ്പെടുത്തി.

ആദ്യഘട്ടത്തില്‍ അന്വേഷണം നല്ല രീതിയില്‍ മുന്നോട്ട് പോയിരുന്നു. എന്നാല്‍ ആരാണ് ആരോപണങ്ങള്‍ക്ക് പിന്നില്‍ എന്ന് പൊലീസ് അന്വേഷിക്കട്ടെയെന്നും അദ്ദേഹം പറഞ്ഞു.