നാളുകളായി ഒളിപ്പിച്ച് വച്ച ആ രഹസ്യം വെളിപ്പെടുത്തി നടന്‍ ജയറാം; എല്ലാവരും അറിയാന്‍ വേണ്ടിയാണ് ഒരു പൊതുവേദിയില്‍ പറയുന്നതെന്നും ജയറാം

ജയറാമിന്റെതായി റിലീസിന് എത്തിയ പുതിയ ചിത്രങ്ങളില്‍ ഒന്നായിരുന്നു പൊന്നിയിന് സെല്‍വന്‍. കല്‍ക്കി കൃഷ്ണമൂര്‍ത്തിയുടെ കഥയെ അടിസ്ഥാനമാക്കി ഒരുക്കിയ ചിത്രത്തില്‍ വന്‍ താരനിരയായിരുന്നു അണിനിരന്നത്.

ആഴ്വാര്‍ കടിയാന്‍ നമ്പി എന്ന കഥാപാത്രമായിട്ടായിരുന്നു ചിത്രത്തില്‍ ജയറാം എത്തിയത്. മികച്ച പ്രശംസ നേടിയ കഥാപാത്രമായിരുന്നു ഇത്. തല മൊട്ട അടിച്ച് കുടവയര്‍ ചാടിയ ലുക്കിലായിരുന്നു ജയറാം.

ഇപ്പോഴിത പൊന്നിയന്‍ സെല്‍വനിലെ ആഴ്വാര്‍ കടിയാന്‍ നമ്പി എന്ന കഥാപാത്രമായി മണിരത്‌നം തന്നെ തിരഞ്ഞെടുക്കാന്‍ കാരണം രമേഷ് പിഷാരടിയാണെന്ന് പറയുകയാണ് ജയറാം.

‘മഴവില്‍ മനോരമ’യുടെ മഴവില്‍ മ്യൂസിക് അവാര്‍ഡ് 2022 ല്‍ സംസാരിക്കുമ്പോഴായിരുന്നു ജയറാമിന്റെ വെളിപ്പെടുത്തല്‍. രമേഷ് പിഷാരടി സംവിധാനം ചെയ്ത ‘പഞ്ചവര്‍ണ്ണത്തത്ത’ എന്ന ചിത്രത്തിലെ തന്റെ മൊട്ടയടിച്ച ലുക്ക് കണ്ടിട്ടാണ് നമ്പിയായി അഭിനയിക്കാന്‍ താന്‍ അനുയോജ്യനാണെന്ന് മണിരത്‌നത്തിനു തോന്നിയത്.

മണിരത്‌നത്തിന്റെ ഓഫിസിന്റെ ചുമരില്‍, തല മൊട്ടയടിച്ച് കുതിരപ്പുറത്തിരിക്കുന്ന തന്റെ, ‘പഞ്ചവര്‍ണത്തത്ത’യുടെ ഒരു വലിയ പോസ്റ്റര്‍ ഒട്ടിച്ചിരുന്നുവെന്നും ഏതെങ്കിലും ഒരു വലിയ വേദിയില്‍ ഇതു പറഞ്ഞ് പിഷാരടിക്ക് സര്‍പ്രൈസ് കൊടുക്കാന്‍ വേണ്ടിയാണ് ഇത്രനാളും തുറന്നു പറയാത്തതെന്നും ജയറാം പറഞ്ഞു.

ചരിത്രത്തില്‍ ഇടം പിടിച്ച സിനിമയുടെ ഭാഗമാകാന്‍ എന്നെ സഹായിച്ചത് പിഷാരടി ആണ് എന്നും ജയറാം കൂട്ടിച്ചേര്‍ത്തു. അതേസമയം രണ്ട് ഭാഗങ്ങളായി ഒരുങ്ങുന്ന ചിത്രത്തിന്റെ ആദ്യ ഭാഗമായിരുന്നു കഴിഞ്ഞ വര്‍ഷം തീയറ്ററില്‍ എത്തിയത്.

ചിത്രത്തിന്റെ രണ്ടാം ഭാഗം ഈ വര്‍ഷം റിലീസുണ്ടാകും. കാര്‍ത്തി, ജയം രവി, വിക്രം, ഐശ്വര്യ റായ്, തൃഷ തുടങ്ങി വമ്പന്‍ താരനിരയായിരുന്നു ചിത്രത്തില്‍ അണിനിരന്നത്.