വിവാഹ ഫോട്ടോഷൂട്ടിനിടെ ഒഴുക്കിൽപെട്ട് നവവരൻ മരിച്ചു.

വിവാഹ ഫോട്ടോ ഷൂട്ടിനിടെ ഒഴുക്കിൽപെട്ട് നവവരൻ മരിച്ചു. കുറ്റ്യാടിപ്പുഴയിലാണ് സംഭവം. കുറ്റ്യാടി കടിയങ്ങാട് പാലേരി സ്വദേശി രജിൻലാൽ ആണ് മരിച്ചത്. ഒഴുക്കിൽപ്പെട്ട് ഭാര്യയെ മലബാർ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചിരിക്കുകയാണ്.

മാർച്ച് 14 നായിരുന്നു ഇവരുടെ വിവാഹം. വിവാഹ ഫോട്ടോഷൂട്ടിന് വേണ്ടിയാണ് ഇവർ എത്തിയത്. ജാനകിക്കാട് ഭാഗത്ത് കുറ്റ്യാടി പുഴയുടെ ചവറം മൂഴിയിൽ ആണ് ഫോട്ടോഷൂട്ട് നടന്നത്. ഫോട്ടോഷൂട്ട് നടക്കുന്നതിനിടെ ഇരുവരും വെള്ളത്തിൽ അകപ്പെടുകയായിരുന്നു.

വെള്ളത്തിൽ അകപ്പെട്ട ഇവരെ ഒപ്പമുണ്ടായിരുന്നവരും നാട്ടുകാരും ചേർന്നാണ് ഉടൻ പുറത്തെടുത്തത്. ഇതിനുശേഷം ഇവരെ പത്തിരികരയിലെ സ്വകാര്യ ആശുപത്രിയിൽ എത്തിച്ചു. എങ്കിലും യുവാവിൻറെ ജീവൻ രക്ഷിക്കാനായില്ല.

പുഴക്കരയിൽ ഫോട്ടോ എടുക്കുന്നതിനിടെ കാൽവഴുതി വീഴുകയായിരുന്നു എന്നാണ് വിവരം. കുറച്ചു മുൻപാണ് ഈ വാർത്ത പുറത്തുവന്നത്.