മീന്‍ നേരെ ചാടിയത് മത്സ്യത്തൊഴിലാളിയുടെ തൊണ്ടയിലേക്ക്; പുറത്തെടുക്കാന്‍ ഒരു മണിക്കൂര്‍ നീണ്ട ശസ്ത്രക്രിയ

മീന്‍ പിടിക്കാന്‍ പോയ മത്സ്യത്തൊഴിലാളിക്ക് ശസ്ത്രക്രിയ ചെയ്യേണ്ടിവന്ന അവസ്ഥ. അപ്രതീക്ഷിതമായിരുന്നു ആ സംഭവങ്ങള്‍. മത്സ്യത്തൊഴിലാളി പിടിച്ച ഒരു മീന്‍ അയാളുടെ തൊണ്ടയിലേക്ക് ചാടിയതാണ് പ്രശ്‌നങ്ങള്‍ക്ക് കാരണമായത്. ജീവന്‍ അപകടത്തിലായതിനെ തുടര്‍ന്ന് അദ്ദേഹത്തെ ശസ്ത്രക്രിയക്ക് വിധേയമാക്കുകയായിരുന്നു.

തായ്ലന്‍ഡിലാണ് സംഭവം. പതിവ് പോലെ മീന്‍ പിടിക്കാന്‍ പോയതായിരുന്നു ആ മത്സ്യത്തൊഴിലാളി. പിടിച്ച മീന്‍ കുട്ടയില്‍ വീഴുന്നതിന് പകരം അദ്ദേഹത്തിന്റെ തൊണ്ടയിലാണ് ചെന്നു വീണത്. ശ്വാസംമുട്ടി പ്രയാസപ്പെടുന്ന അദ്ദേഹത്തെ കൂടെയുണ്ടായിരുന്നവര്‍ ആശുപത്രിയില്‍ എത്തിച്ചു. ഹോസ്പിറ്റലില്‍ എത്തിയപ്പോള്‍ ആ മീന്‍ തൊണ്ടയ്ക്കും നാസികാദ്വാരത്തിനുമിടയില്‍ തങ്ങിനില്‍ക്കുകയായിരുന്നു. ശ്വാസനാളത്തിലൂടെ താഴേക്ക് നീങ്ങാന്‍ ശ്രമിച്ച മീന്‍ അദ്ദേഹത്തിന്റെ ശരീരത്തിലേക്കുള്ള ഓക്‌സിജന്‍ തടസപ്പെടുത്തുകയും തൊണ്ടയില്‍ കുടുങ്ങുകയും ചെയ്തു. ഇതോടെ കാര്യങ്ങള്‍ ഗുരുതരമായി.

രണ്ട് ഡോക്ടര്‍മാരും മൂന്ന് നഴ്‌സുമാരും ചേര്‍ന്ന് ഒരു മണിക്കൂര്‍ നീണ്ട ശസ്ത്രക്രിയക്കൊടുവില്‍ മീനിനെ പുറത്തെടുത്തു. രോഗിയുടെ അവയവങ്ങള്‍ക്ക് കേടുപാടുകള്‍ സംഭവിക്കാതിരിക്കാന്‍ ഡോക്ടര്‍മാര്‍ വളരെ ശ്രദ്ധയോടെയാണ് ശസ്ത്രക്രിയ നടത്തിയത്. ആനബാസ് ഇനത്തില്‍ പെട്ട മീനാണ് അയാളുടെ തൊണ്ടയില്‍ കുടുങ്ങിയതെന്നാണ് റിപ്പോര്‍ട്ട്.