‘ഞങ്ങളുടെ മരണത്തിന് കാരണക്കാരായ അവരെ ശിക്ഷിക്കണം’; എഫ്.ബിയില്‍ പോസ്റ്റിട്ടതിന് പിന്നാലെ കാര്‍ ലോറിയിലിടിച്ച് മരണം; ദുരൂഹത

തിരുവനന്തപുരം ആറ്റിങ്ങലില്‍ ടിപ്പര്‍ ലോറിയില്‍ കാറിടിച്ച് അച്ഛനും മകനും മരിച്ചതില്‍ ദുരൂഹത. ഇവരുടെ മരണം ആത്മഹത്യയാണെന്ന സൂചന പൊലീസിന് ലഭിച്ചു. മണികണ്‌ഠേശ്വ സ്വദേശികളായ പ്രകാശ് ദേവരാജന്‍(50), മകന്‍ ശിവ്‌ദേവ് (12) എന്നിവരാണ് മരിച്ചത്.

കഴിഞ്ഞ ദിവസം രാത്രിയാണ് അപകടം നടന്നത്. ഇവര്‍ സഞ്ചരിച്ച കാറ് ടാങ്കര്‍ ലോറിയുമായി കൂട്ടിയിടിക്കുകയായിരുന്നു. ആറ്റിങ്ങല്‍ ഭാഗത്തേക്ക് പോകുകയായിരുന്ന ഇവരുടെ കാര്‍ എതിരെ വന്ന ലോറിയില്‍ ഇടിച്ചാണ് അപകടമുണ്ടായത്. അപകടത്തില്‍ പ്രകാശ് തത്ക്ഷണം മരിച്ചിരുന്നു. കാറ് വെട്ടിപൊളിച്ചെടുത്താണ് ശിവദേവിനെ പുറത്തെടുത്തത്. ആശുപത്രിയിലേക്ക് കൊണ്ടുപോകും വഴി ശിവദേവും മരിച്ചു.

കാറില്‍ നിന്ന് പ്രകാശ് എഴുതിയതെന്ന് സംശയിക്കുന്ന ഒരു കുറിപ്പ് പൊലീസിന് ലഭിച്ചിട്ടുണ്ട്. ഇതാണ് ആത്മഹത്യയെന്ന സംശയത്തിലേക്ക് പൊലീസിനെ എത്തിച്ചത്. ഇത് കൂടാതെ മരണത്തിന് മുന്‍പായി പ്രകാശ് ഫേസ്ബുക്കിലിട്ട പോസ്റ്റും സംശയത്തിനിടയാക്കിയിട്ടുണ്ട്. തന്റെയും മക്കളുടേയും മരണത്തിന് കാരണക്കാരായ അവരെ നിയമത്തിന് മുന്നില്‍ കൊണ്ടുവന്ന് ശിക്ഷ വാങ്ങി കൊടുക്കണമെന്ന് അപേക്ഷിക്കുന്നു എന്നാണ് പ്രകാശ് ഫേസ്ബുക്കിലിട്ട പോസ്റ്റ്. രണ്ട് പേരുടെ ചിത്രങ്ങളും പോസ്റ്റ് ചെയ്തിരുന്നു. പ്രകാശിന് സാമ്പത്തിക ബുദ്ധിമുട്ടുകള്‍ ഉണ്ടായിരുന്നകായാണ് പൊലീസിന് ലഭിച്ചിരിക്കുന്ന സൂചന. ഇതിന്റെ അടിസ്ഥാനത്തിലും അന്വേഷമം നടക്കും.