മോഡിക്ക് എതിരെയുള്ള ‘അപശകുനം’ പരാമര്‍ശം; രാഹുല്‍ ഗാന്ധിക്ക് നോട്ടീസ് അയച്ച് തിരഞ്ഞെടുപ്പു കമ്മിഷന്‍

ന്യൂഡല്‍ഹി: ലോകകപ്പ് ക്രിക്കറ്റ് ഫൈനലില്‍ ഇന്ത്യയുടെ തോല്‍വിയുമായി ബന്ധപ്പെട്ട് പ്രധാനമന്ത്രി നരേന്ദ്ര മോദിയെ പരോക്ഷമായി ‘അപശകുനം’ എന്നു വിശേഷിപ്പിച്ച കോണ്‍ഗ്രസ് നേതാവ് രാഹുല്‍ ഗാന്ധിക്ക് തിരഞ്ഞെടുപ്പു കമ്മിഷന്റെ നോട്ടിസ്.

സംഭവത്തില്‍ വിശദീകരണം ആവശ്യപ്പെട്ടാണ് നോട്ടിസ് അയച്ചിരിക്കുന്നത്. ശനിയാഴ്ച വൈകിട്ടോടെ വിശദീകരണം നല്‍കണമെന്നാണ് നോട്ടിസിലുള്ളത്.ബിജെപി നല്‍കിയ പരാതിയുടെ അടിസ്ഥാനത്തിലാണിത്.

രാഷ്ട്രീയ എതിരാളികള്‍ക്കെതിരെ തെളിവില്ലാത്ത ആരോപണങ്ങള്‍ ഉന്നയിക്കുന്നതിന് നിയമപ്രകാരം നിയന്ത്രണമുണ്ടെന്ന് തിരഞ്ഞെടുപ്പു കമ്മിഷന്‍ നോട്ടിസില്‍ ചൂണ്ടിക്കാട്ടി.

നിയമസഭാ തിരഞ്ഞെടുപ്പിന് ഒരുങ്ങുന്ന രാജസ്ഥാനില്‍ തിരഞ്ഞെടുപ്പു പ്രചാരണ യോഗത്തില്‍ പ്രസംഗിക്കുമ്പോഴാണ് രാഹുല്‍ ഗാന്ധി വിവാദ പരാമര്‍ശം നടത്തിയത്.

അഹമ്മദാബാദിലെ നരേന്ദ്ര മോദി സ്റ്റേഡിയത്തില്‍ നടന്ന ഓസ്‌ട്രേലിയയ്ക്കെതിരായ ഏകദിന ലോകകപ്പ് ഫൈനലില്‍ പ്രധാനമന്ത്രി നരേന്ദ്ര മോഡിയും പങ്കെടുത്തിരുന്നു.

ഇതുമായി ബന്ധപ്പെടുത്തി പരോക്ഷമായിട്ടായിരുന്നു രാഹുല്‍ ഗാന്ധിയുടെ പരിഹാസം. രാജസ്ഥാനിലെ ജലോറില്‍ തിരഞ്ഞെടുപ്പ് റാലിയെ അഭിസംബോധന ചെയ്യവെ ആയിരുന്നു രാഹുല്‍ ഗാന്ധിയുടെ പരിഹാസം.

റാലിക്കിടെ, ആള്‍ക്കൂട്ടത്തിലെ ആരോ ‘പനോട്ടി’ എന്ന് അലറി, (നിര്‍ഭാഗ്യകരമെന്നോ ചീത്ത ശകുനമെന്നോ അര്‍ത്ഥം വരുന്ന വാക്ക്).

മറുപടിയായി രാഹുല്‍ ചിരിച്ചുകൊണ്ട് പറഞ്ഞു: ‘ഹാന്‍… പനൂട്ടി, പനൂട്ടി… നമ്മുടെ കുട്ടികള്‍ നന്നായി കളിച്ച് ജയിച്ച് വരികയായിരുന്നു, എന്നാല്‍ ദുശകുനം വന്നതോടെ കളി തോറ്റു, മാധ്യമങ്ങള്‍ ഇത് ചൂണ്ടിക്കാണിക്കുന്നില്ല എന്നാണ് മോഡിയുടെ പേര് എടുത്ത് പറയാതെ രാഹുല്‍ പറഞ്ഞത്.