സിഗരറ്റ് വലിക്കുന്ന കാളിയിൽ പ്രതിഷേധം ശക്തം. മതവികാരം വ്രണപ്പെടുത്തിയ സംവിധായകയെ അറസ്റ്റ് ചെയ്യണമെന്ന് ആവശ്യം.

സംവിധായക ലീന മണിമേഖലയുടെ പുതിയ ഡോക്യുമെൻററി ആണ് കാളി. ഈ ഡോക്യുമെൻററിയുടെ പോസ്റ്ററിനെതിരെ വ്യാപകമായ പ്രതിഷേധമാണ് ഇപ്പോൾ ഉയരുന്നത്. ഹിന്ദു ദേവതയായ കാളി സിഗരറ്റ് വലിക്കുന്ന രീതിയിലാണ് പോസ്റ്റർ ഉള്ളത്. മതവികാരം വ്രണപ്പെടുത്തുന്നു എന്നതാണ് ഉയരുന്ന പ്രധാന ആക്ഷേപം.

സാമൂഹ്യ മാധ്യമങ്ങളിൽ അടക്കം വലിയതോതിലുള്ള പ്രതിഷേധമാണ് ഇതിനെതിരെ ഉയരുന്നത്. സംവിധായകയെ അറസ്റ്റ് ചെയ്യണമെന്ന് അടക്കമുള്ള ആവശ്യം സാമൂഹ്യ മാധ്യമങ്ങളിൽ ശക്തമാണ്. ചിത്രത്തിൻറെ പോസ്റ്റർ സംവിധായക തന്നെ സാമൂഹ്യ മാധ്യമങ്ങളിൽ പങ്കുവെച്ചിരുന്നു. ഇതോടെയാണ് കടുത്ത വിവാദം ആരംഭിച്ചത്. കാളി ദേവതയുടെ വേഷം ധരിച്ച ഒരു സ്ത്രീ സിഗരറ്റ് വലിക്കുന്നതിനോടൊപ്പം ത്രിശൂലം, അരിവാൾ, എൽ ജി ബി ടി ക്യു കമ്മ്യൂണിറ്റി പതാക എന്നിവ പിടിച്ചിരിക്കുന്നതാണ് പോസ്റ്ററിൽ ഉള്ളത്.

ഇതു മതനിന്ദയാണ് എന്നും മതവികാരം വ്രണപ്പെടുത്തുന്നു എന്നും ഒരു വിഭാഗം ആരോപിക്കുന്നു. ഇതിനെതിരെ നടപടിയെടുക്കണം എന്ന ആവശ്യമാണ് ഇവർ ഉന്നയിക്കുന്നത്. അറസ്റ്റ് ലീന മണി മേഖല എന്ന ഹാഷ് ടാഗ് സാമൂഹ്യ മാധ്യമങ്ങളിൽ പ്രചരിക്കുന്നുണ്ട്. അതിനിടയിൽ പ്രതികരണവുമായി ലീന മണിമേഖലയും എത്തി.

പ്രതിഷേധിക്കുന്നതിന് മുമ്പ് ഡോക്യുമെൻററി കാണണം എന്നാണ് ഇവർ ആവശ്യപ്പെടുന്നത്. ചിത്രം കണ്ടു കഴിഞ്ഞാൽ ലവ് യു ലീന മണി മേഖല എന്ന രീതിയിലേക്ക് ഹാഷ്ടാഗ് നിങ്ങൾ മാറ്റും എന്നും സംവിധായക പറയുന്നു. എന്തായാലും സംഭവം വലിയ ചർച്ചാവിഷയം ആവുകയാണ് ഇപ്പോൾ.