ആ ഹോട്ടലില്‍ വില കൂടുതലെന്ന റിപ്പോര്‍ട്ട് കിട്ടി; നടപടിയെടുക്കാന്‍ ജില്ലാഭരണകൂടത്തിനാകില്ലെന്ന് കളക്ടര്‍

ഭക്ഷണത്തിന് അമിത വില ഈടാക്കിയെന്ന പി.പി ചിത്തരഞ്ജന്‍ എംഎല്‍എയുടെ പരാതിയില്‍ നടപടിയെടുക്കാന്‍ ജില്ലാ ഭരണകൂടത്തിന് കഴിയില്ലെന്ന് കളക്ടര്‍. പി.പി ചിത്തരഞ്ജന്‍ എംഎല്‍എ ഭക്ഷണം കഴിച്ച ഹോട്ടലില്‍ വില കൂടുതല്‍ ആയിരുന്നുവെന്ന് ജില്ലാ സപ്ലൈ ഓഫീസറുടെ റിപ്പോര്‍ട്ട് കിട്ടി. എന്നാല്‍, നിയമപരമായ നടപടിക്ക് ജില്ലാ ഭരണകൂടത്തിന് അധികാരമില്ലെന്ന് കളക്ടര്‍ അറിയിച്ചു.

അതിനിടെ ഹോട്ടല്‍ ബില്ല് വിവാദത്തില്‍ വീണ്ടും വിശദീകരണവുമായി ചിത്തരഞ്ജന്‍ എംഎല്‍എ രംഗത്തെത്തി. ഹോട്ടല്‍ ഭക്ഷണത്തിന് അമിത വില ഈടാക്കിയത് ചൂണ്ടിക്കാട്ടിയ തന്നെ ട്രോളുകള്‍ ഉണ്ടാക്കി അപഹസിക്കുന്നെന്ന് ചിത്തരഞ്ജന്‍ കുറ്റപ്പെടുത്തി. ചിലര്‍ വ്യക്തഹത്യ ചെയ്യുകയാണ്. താന്‍ പ്രതികരിച്ചത് ദുര്‍വ്യാഖ്യാനം ചെയ്യപ്പെടുന്നു. ട്രോളുകള്‍ക്ക് പിന്നില്‍ ഹോട്ടലുടമ തന്നെയാകാം. കഴിച്ച ഭക്ഷണത്തിന്റെ പണം നല്‍കിയിട്ട് തന്നെയാണ് മടങ്ങിയതെന്നും എംഎല്‍എ വ്യക്തമാക്കി.

കഴിഞ്ഞ ദിവസമാണ് ആലപ്പുഴ കണിച്ചുകുളങ്ങരയിലെ ഒരു ഹോട്ടലില്‍ നിന്ന് ചിത്തരഞ്ജന്‍ എംഎല്‍എ അഞ്ച് അപ്പവും രണ്ട് മുട്ടക്കറിയും കഴിച്ചത്. ഇതിന് 184 രൂപയാണ് ഹോട്ടല്‍ ഈടാക്കിയത്. ഇതിനെതിരെ എംഎല്‍എ കളക്ടര്‍ക്ക് പരാതി നല്‍കുകയായിരുന്നു.