‘അവളുടെ മരണത്തിന് ശേഷം കുടുംബവുമായി യാതൊരു ബന്ധവുമില്ല; അഭിമുഖങ്ങളില്‍ മെഹ്നാസ് പറയുന്നത് കള്ളം’; റിഫയുടെ സഹോദരന്‍

മലയാളി വ്‌ളോഗര്‍ റിഫ മെഹ്നുവിന്റെ മരണത്തില്‍ ഭര്‍ത്താവ് മെഹ്നാസിനെതിരെ ഗുരുതര ആരോപണങ്ങളുമായി സഹോദരന്‍ റിജിന്‍. റിഫയുടെ മരണത്തിന് ശേഷം കുടുംബവുമായി മെഹ്നാസ് യാതൊരു ബന്ധവും കാണിച്ചിരുന്നില്ലെന്ന് റിജിന്‍ പറഞ്ഞു. യൂട്യൂബ് ചാനലുകള്‍ക്ക് അഭിമുഖം നല്‍കി തന്റെ ഭാഗം ന്യായീകരിക്കാനാണ് അയാളുടെ ശ്രമം. അഭിമുഖങ്ങളില്‍ പറയുന്ന കാര്യങ്ങള്‍ കളവാണ്. താന്‍ കൂടി ഉള്‍പ്പെട്ട പലകാര്യങ്ങളും തെറ്റായാണ് അവതരിപ്പിക്കുന്നത്. റിഫയുടെ മരണത്തില്‍ ദുരൂഹതയുണ്ടെന്നും റിജിന്‍ കൂട്ടിച്ചേര്‍ത്തു. ഒരു മാധ്യമത്തോടാണ് റിജിന്റെ പ്രതികരണം.

ദുബായില്‍ എത്തിയ ശേഷം കാശ് കയ്യില്‍ നില്‍ക്കുന്നില്ലെന്ന് റിഫ പറഞ്ഞിരുന്നു. മെഹ്നാസ് ജോലിക്ക് പോകുന്നില്ലെന്നും താന്‍ പണിയെടുത്ത കാശ് മെഹ്നാസ് ധൂര്‍ത്തടിക്കുന്നുവെന്നും അവള്‍ പറഞ്ഞിരുന്നു. ബുദ്ധിമുട്ടാണെങ്കില്‍ നാട്ടിലേക്ക് തിരിച്ചുവരാന്‍ പറഞ്ഞിരുന്നു. എന്നാല്‍, അവനില്ലാതെ പറ്റില്ല എന്നായിരുന്നു റിഫ പറഞ്ഞിരുന്നത്. ഇടയ്ക്ക് റിഫ നാട്ടില്‍ വന്ന് നിന്നിരുന്നു. പക്ഷേ, തിരിച്ചുപോയപ്പോഴാണ് പ്രശ്നങ്ങള്‍ തുടങ്ങിയതെന്നും റിജിന്‍ പറഞ്ഞു.

അവസാനമായി റിഫ പറഞ്ഞത് മെഹ്നാസിന്റെ സുഹൃത്ത് ജംഷാദ് ശല്യപ്പെടുത്തുന്നു എന്നാണ്. രാത്രിയില്‍ ഉണര്‍ന്ന് നോക്കുമ്പോള്‍ ജംഷാദാണ് അടുത്ത് കിടക്കുന്നതെന്ന് കണ്ടുവെന്നും ഫാന്‍ ഓഫ് ചെയ്യുക, ഉറക്കത്തില്‍ ശല്യപ്പെടുത്തുക എന്നിവയൊക്കെ ചെയ്യാറുണ്ടായിരുന്നു എന്ന് പറഞ്ഞു. റിഫയേയും ജംഷാദിനേയും മാത്രം മുറിയിലാക്കി മെഹ്നാസ് പുറത്ത് പോവാറുണ്ടായിരുന്നു. മെഹ്നാസിന് സുഹൃത്തുക്കളെ വിശ്വാസമായിരുന്നുവെന്നും റിജിന്‍ കൂട്ടിച്ചേര്‍ത്തു.