രണ്ട് ദിവസം മുന്നേ മരിച്ച അഞ്ച് വയസ്സുകാരിയുടെ കുഴിമാടം തൊണ്ടി മൃതദേഹം പുറത്തെടുത്തു; മൃതദേഹത്തിനൊപ്പം കിടന്നുറങ്ങി യുവാവ്, ഞെട്ടിക്കുന്ന സംഭവമിങ്ങനെ

അഞ്ച് വയസ്സുകാരിയുടെ മൃതദേഹം കുഴിമാടത്തില്‍ നിന്ന് പുറത്തെടുത്ത് അവളുടെ അരികില്‍ കിടന്ന് മദ്യപാനി. വാരണാസിയില്‍ നിന്നാണ് ഞെട്ടിക്കുന്ന വാര്‍ത്ത എത്തുന്നത്.

കുട്ടിയുടെ പിതാവിന്റെ പരാതിയില്‍ റഫീഖ് എന്ന ചോട്ടുവിനെ പോലീസ് അറസ്റ്റ് ചെയ്തു. ശ്മശാനത്തില്‍ കുഴിവെട്ടുന്ന വ്യക്തിയാണ് റഫീഖ്.

സദാനന്ദ് ബസാര്‍ സ്വദേശിയുടെ അഞ്ച് വയസുകാരിയായ മകളാണ് രോഗം ബാധിച്ച് മരിച്ചത്. പെണ്‍കുട്ടിയുടെ മൃതദേഹം റെവാരി തലാബ് ഏരിയയില്‍ സ്ഥിതി ചെയ്യുന്ന ശ്മശാനത്തില്‍ സംസ്‌കരിച്ചു. ബുധനാഴ്ച രാത്രി ഒമ്പത് മണിയോടെയാണ് പെണ്‍കുട്ടിയുടെ മൃതദേഹം സംസ്‌കരിച്ചത്.

കുട്ടിയുടെ മരണത്തില്‍ ദുഃഖിതനായ പിതാവ് വ്യാഴാഴ്ച വീണ്ടും കുട്ടിയുടെ കുഴിമാടത്തില്‍ എത്തി. എന്നാല്‍ പിതാവ് എത്തി നോക്കിയപ്പോള്‍ കുഴിമാടം തൊണ്ടിയ നിലയിലായിരുന്നു.

തുടര്‍ന്ന് പിതാവ് നടത്തിയ പരിശോധനയില്‍ ഛോട്ടു എന്ന മുഹമ്മദ് റഫീഖിനെ ശ്മശാനത്തിന്റെ ഒരു മൂലയില്‍ മകളുടെ മൃതദേഹത്തോടൊപ്പം ഉറങ്ങുന്നതായി കണ്ടെത്തുകയായിരുന്നു.

പിന്നാലെ സംഭവം പോലീസിനെ അറിയിക്കുകയായിരുന്നു. വിവരത്തിന്റെ അടിസ്ഥാനത്തില്‍ ലക്ഷ പോലീസ് പ്രതിയായ ഛോട്ടു എന്ന മുഹമ്മദ് റഫീഖിനെ അറസ്റ്റ് ചെയ്തു.

പെണ്‍കുട്ടിയുടെ മൃതദേഹം പോസ്റ്റ്മോര്‍ട്ടത്തിന് അയച്ചു. മൃതദേഹത്തോട് അനാദരവ് കാണിച്ചിട്ടുണ്ടോ എന്നാണ് പരിശോധിക്കുന്നത്.

അതേസമയം താന്‍ മദ്യപിച്ചിരുന്നതായും , മദ്യലഹരിയില്‍ ചെയ്തതാണ് എന്നും നടന്നത് എന്തെന്ന് ഓര്‍മ്മയില്ല എന്നുമാണ് മുഹമ്മദ് റഫീഖ് പറയുന്നത്.