വേദനകള്‍ക്കിടയിലും മനോഹരമായി പുഞ്ചിരിച്ച് മഹേഷ് കുഞ്ഞുമോന്‍; മോനെ, നീ എത്രയും പെട്ടന്ന് സുഖം ആയിട്ട് വരട്ടെ ഞങ്ങളുടെ എല്ലാവരുടെയും പ്രാത്ഥന കൂടെ ഉണ്ടാകുമെന്ന് ബിനു അടിമാലി

കൊല്ലം സുധിയുടെ മരണത്തിന് കാരണമായ വാഹനാപകടത്തില്‍ പരിക്കേറ്റ് ചികിത്സയില്‍ കഴിയുന്ന മഹേഷ് കുഞ്ഞുമോന്‍ സുഖം പ്രാപിച്ചു വരികയാണ്. ഗുരുതരമായി പരിക്കേറ്റ താരം വീട്ടില്‍ വിശ്രമത്തിലാണ്.

ഇപ്പോഴിത മഹേഷ് കുഞ്ഞുമോനെ വീട്ടില്‍ എത്തി സന്ദര്‍ശിച്ചിരിക്കുകയാണ് ബിനു അടിമാലി. ഇതിന്റെ ചിത്രങ്ങളും സോഷ്യല്‍ മീഡിയയില്‍ പങ്കുവച്ചിട്ടുണ്ട്. മോനെ, നീ എത്രയും പെട്ടന്ന് സുഖം ആയിട്ട് വരട്ടെ ഞങ്ങളുടെ എല്ലാവരുടെയും പ്രാത്ഥന കൂടെ ഉണ്ടാകുമെന്ന് ചിത്രങ്ങള്‍ പങ്കുവച്ച് ബിനു അടിമാലി കുറിച്ചു.

അതേസമയം കഴിഞ്ഞ ദിവസം നടനും അവതാരകനുമായ മിഥുന്‍ രമേശും മഹേഷ് കുഞ്ഞുമോനെ വീട്ടില്‍ എത്തി സന്ദര്‍ശിച്ചിരുന്നു.അവന്റെ പേര് മഹേഷ് എന്നാണ്, അവന്‍ തിരിച്ചു വരും നേരത്ത ഉള്ളതിലും കിടിലമായി- എന്നാണ് ചിത്രങ്ങള്‍ പങ്കുവച്ച് മിഥുന്‍ കുറിക്കുന്നത്.

ജൂണ്‍ അഞ്ചാം തീയതി പുലര്‍ച്ചെ നാലരയോടെ ദേശീയപാത 66 ലെ പനമ്പിക്കുന്നില്‍ ആണ് മിമിക്രി കലാകാരന്‍ കൊല്ലം സുധിയുടെ മരണത്തിനിടയാക്കിയ വാഹനാപകടം നടന്നത്. കൊല്ലം സുധിയും ബിനു അടിമാലിയും മഹേഷ് കുഞ്ഞുമോനും ഉല്ലാസും ഈ വാഹനത്തില്‍ ഉണ്ടായിരുന്നു.

സ്റ്റേജ്‌ഷോയ്ക്കു ശേഷം വടകരയില്‍നിന്ന് എറണാകുളത്തേക്കു മടങ്ങുകയായിരുന്നു താരങ്ങള്‍. സംഘം സഞ്ചരിച്ചിരുന്ന കാറും പിക്കപ് വാനും കൂട്ടിയിടിച്ചാണ് അപകടമുണ്ടായത്. തലയ്ക്ക് പരുക്കേറ്റ സുധിയെ പെട്ടെന്ന് തന്നെ കൊടുങ്ങല്ലൂരിലെ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല.

ബിനു അടിമാലിയും ഉല്ലാസ് അരൂരും മഹേഷ് കുഞ്ഞുമോനും പരിക്കുകള്‍ ഏറ്റിരുന്നു. മൂന്ന് പേരും സുഖം പ്രാപിച്ച് വരികയാണ്. അടുത്തിടെ സോഷ്യല്‍ മീഡിയയില്‍ വളരെ ശ്രദ്ധിക്കപ്പെട്ട താരമാണ് മഹേഷ് കുഞ്ഞുമോന്‍.

കോവിഡ്കാലത്ത് പിണറായി വിജയന്റെ ശബ്ദം അനുകരിച്ചുള്ള വിഡിയോയിലൂടെയാണ് മഹേഷ് കുഞ്ഞുമോന്‍ ശ്രദ്ധേയനാകുന്നത്. ശബ്ദ അനുകരണത്തിന്റെ പൂര്‍ണ്ണത കൊണ്ട് ആരാധകരെ സൃഷ്ടിക്കാന്‍ മഹേഷിന് കഴിഞ്ഞു.’വിക്രം’ സിനിമയുടെ മലയാളം പതിപ്പില്‍ ഏഴ് കഥാപാത്രങ്ങള്‍ക്ക് ശബ്ദം നല്‍കി മഹേഷ് സിനിമാലോകത്തെയും ഞെട്ടിച്ചിട്ടുണ്ട്.