ഓരോപടിയായിട്ട് മുന്നിലേക്ക് കയറി വരികയാണ് അവള്‍; ഭാവനയെ കുറിച്ച് ഭാഗ്യലക്ഷ്മി

വിവാഹത്തോടെ അഭിനയത്തില്‍ നിന്ന് വിട്ടു നിന്ന നടി ഭാവനയുടെ തിരിച്ചുവരവ് ആരാധകര്‍ ഒരുപാട് ആഗ്രഹിച്ചിരുന്നു. ഈ അടുത്തായിരുന്നു അഞ്ചു വര്‍ഷങ്ങള്‍ക്കു ശേഷം താന്‍ മലയാള സിനിമയില്‍ എത്തുന്നുവെന്ന സന്തോഷം താരം പങ്കുവെച്ചത്. പിന്നാലെ ഭാവനയെ സപ്പോര്‍ട്ട് ചെയ്ത് നിരവധി പേരാണ് രംഗത്തെത്തി.

ഐഎഫ്എഫ്കെ വേദിയിലെത്തിയ ഭാവനയ്ക്ക് ഗംഭീര വരവേല്‍പ്പായിരുന്നു ലഭിച്ചത്. ഭാവനയ്ക്ക് ലഭിച്ച വരവേല്‍പ്പില്‍ ഒരുപാട് സന്തോഷമുണ്ടെന്നായിരുന്നു ഭാഗ്യലക്ഷ്മി പ്രതികരിച്ചത്. റിപ്പോര്‍ട്ടര്‍ ചാനലിന് നല്‍കിയ പ്രതികരണത്തിലായിരുന്നു ഭാഗ്യലക്ഷ്മി ഭാവനയുടെ വരവിനെക്കുറിച്ച് വാചാലയായത്.

ഓരോപടിയായിട്ട് മുന്നിലേക്ക് കയറി വരികയാണല്ലോ അവള്‍, വനിത ദിനത്തില്‍ ഒരു ശക്തമായ മെസ്സേജുമായി അവളെത്തി. അത് കഴിഞ്ഞ് അവളുടെ സിനിമ അനൗണ്‍സ് ചെയ്തു. ഇപ്പോഴിതാ ഒരു പൊതുചടങ്ങില്‍ വേദിയില്‍ വരുന്നു. ഇതേക്കുറിച്ച് ഞങ്ങള്‍ ഒരാഴ്ചയായി സംസാരിക്കുന്നുണ്ടായിരുന്നു. നിന്റെ ഈ വരവ് ജനങ്ങള്‍ ഇരുകൈയ്യും നീട്ടി സ്വീകരിക്കും. നീ പോലും പ്രതീക്ഷിക്കാത്തത്ര ആള്‍ക്കാര്‍ സന്തോഷത്തോടെ നിന്നെ സ്വീകരിക്കുമെന്നുമായിരുന്നു ഞാന്‍ അവളോട് പറഞ്ഞത്.

അങ്ങനെയായിരിക്കുമല്ലേ ചേച്ചിയെന്നായിരുന്നു ഭാവന എന്നോട് ചോദിച്ചത്. അവളുടെ വരവില്‍ ഞങ്ങളത് നേരിട്ട് കണ്ടു. എല്ലാവരും എഴുന്നേറ്റ് നിന്ന് കൈയ്യടിച്ചാണ് അവളെ സ്വീകരിച്ചത്. എന്ത് സംഭവിച്ചാലും ശരി ഞാന്‍ അത് അതിജീവിക്കും. സമൂഹത്തിന് മുന്നില്‍ തല ഉയര്‍ത്തി നടക്കേണ്ടവള്‍ തന്നെയാണ് ഞാനെന്ന് അവള്‍ തെളിയിക്കുകയായിരുന്നു.