ജീവിതത്തിലെ പുതിയ സന്തോഷം പങ്കുവെച്ച് ബാബുരാജും വാണി വിശ്വനാഥും, എന്തേ ഇത്ര വൈകിയത് എന്ന് പ്രേക്ഷകർ!

മലയാളികൾക്ക് ഏറെ പ്രിയപ്പെട്ട താരങ്ങളിലൊരാളാണ് വാണിവിശ്വനാഥ്. ഏഴു വർഷങ്ങൾക്കു ശേഷം മലയാള സിനിമയിലേക്ക് തിരിച്ചു വരാൻ ഒരുങ്ങുകയാണ് താരം. നടനും ഭർത്താവുമായ ബാബുരാജ് ആണ് ചിത്രത്തിൽ കേന്ദ്രകഥാപാത്രത്തെ അവതരിപ്പിക്കുന്നത് എന്നതും ശ്രദ്ധേയമാണ്. ഇരുവരും ഒന്നിക്കുന്ന സിനിമയുടെ ടൈറ്റിൽ ലോഞ്ച് കഴിഞ്ഞദിവസം തിരുവനന്തപുരത്ത് നടന്നു. “ദി ക്രിമിനൽ ലോയർ” എന്നാണ് സിനിമയുടെ പേര്. ഒരു ക്രൈം ത്രില്ലർ ആയിട്ടാണ് സിനിമ ഒരുക്കുന്നത്.

ജിതിൻ ജിത്തു ആണ് സിനിമ സംവിധാനം ചെയ്യുന്നത്. നവാഗതനായ സംവിധായകനാണ് ഇദ്ദേഹം. ഉമേഷ് എസ് മോഹൻ ആണ് സിനിമയുടെ തിരക്കഥ ഒരുക്കുന്നത്. തേർഡ് ഐ മീഡിയ മേക്കേഴ്സ് ഫിലിം ബാനറിലാണ് സിനിമ ഒരുങ്ങുന്നത്. സിനിമാ മേഖലയിലുള്ള നിരവധി പ്രമുഖ ചിത്രത്തിൽ പ്രധാന വേഷങ്ങളിൽ എത്തുന്നു എന്നാണ് നിലവിൽ അറിയാൻ സാധിക്കുന്നത്.

“വീണ്ടും മലയാളി പ്രേക്ഷകരെ കാണാൻ പോകുന്നു എന്നതിൽ ഒരുപാട് സന്തോഷം. തിരിച്ചുവരവ് നല്ലൊരു കഥാപാത്രത്തിലൂടെ ആണ് എന്നതും കൂടുതൽ സന്തോഷം നൽകുന്നു. ഇത്തരത്തിലൊരു കഥാപാത്രത്തിനുവേണ്ടി വാണി ചേച്ചി കാത്തിരിക്കുകയായിരുന്നോ എന്ന് എല്ലാവരും ചോദിക്കുന്നു. എന്നാൽ അങ്ങനെയല്ല, വ്യക്തിപരമായ ചില കാര്യങ്ങൾക്ക് വേണ്ടി സിനിമ മാറ്റിവെച്ചു എന്നതായിരുന്നു സത്യം. തിരിച്ചു വന്നപ്പോൾ അത് നല്ല കഥാപാത്രത്തിലൂടെ ആയി എന്നത് ഒരു നിമിത്തം മാത്രം” – വാണിവിശ്വനാഥ് പറയുന്നു.

“ക്രൈം ത്രില്ലർ സിനിമകളുടെ വലിയ ആരാധിക ആണ് ഞാൻ. ഈ ഒരു ത്രെഡ് കേട്ടപ്പോൾ ഒരുപാട് ഇഷ്ടപ്പെട്ടു. എൻറെ കഥാപാത്രം പോലെ ബാബു ചേട്ടൻ അവതരിപ്പിക്കുന്നതും നല്ലൊരു കഥാപാത്രത്തെ ആണ്. സോൾട്ട് ആൻഡ് പേപ്പർ, ജോജി എന്നീ ചിത്രങ്ങളിലെ വേഷങ്ങൾ പോലെ തന്നെ നിങ്ങൾ ഇഷ്ടപ്പെടുന്ന ഒരു വേഷം തന്നെ ആകും ഈ ചിത്രത്തിൽ അദ്ദേഹം അവതരിപ്പിക്കുന്നത്” – വാണി വിശ്വനാഥ് കൂട്ടിച്ചേർത്തു.