കാലൊടിഞ്ഞെന്ന് പറഞ്ഞ് ഫോണ്‍ കോള്‍; നാല് ആംബുലന്‍സുകള്‍ പാഞ്ഞെത്തിയപ്പോള്‍ പ്രദേശം കാലി; തട്ടിപ്പ്

കോട്ടയം നാഗമ്പടത്ത് ആംബുലന്‍സുകളെ വിളിച്ചുവരുത്തി കബളിപ്പിച്ചെന്ന് പരാതി. കാലിന് പരുക്കേറ്റ രോഗിയെ നെടുമ്പാശ്ശേരിയില്‍ എത്തിക്കണമെന്ന് പറഞ്ഞായിരുന്നു ഫോണ്‍ കോള്‍. നാല് ആംബുലന്‍സുകള്‍ പാഞ്ഞെത്തിയെങ്കിലും പ്രദേശത്ത് രോഗിയുണ്ടായിരുന്നില്ല.

ഐ.സി.യു സൗകര്യമുള്ള നാല് ആംബുലന്‍സുകളെയാണ് അടിയന്തര ആവശ്യമെന്നു പറഞ്ഞ് വിളിച്ചുവരുത്തി കബളിപ്പിച്ചത്. അപകടത്തില്‍പ്പെട്ട് കാല്‍ ഒടിഞ്ഞു ഇരിക്കുകയാണെന്നും അത്യാവശ്യമായി നെടുമ്പാശേരി വിമാനത്താവളത്തില്‍ പോകേണ്ടതുണ്ടെന്നുമാണ് വിളിച്ചയാള്‍ ആവശ്യപ്പെട്ടത്. നാഗമ്പടം സ്വകാര്യ ബസ് സ്റ്റാന്‍ഡിന്റെ മുന്‍വശത്ത് എത്താനായിരുന്നു വിളിച്ചയാള്‍ ആവശ്യപ്പെട്ടത്. ഹിന്ദി സംസാരിക്കുന്ന ആളാണ് വിളിച്ചതെന്ന് ഡ്രൈവര്‍മാര്‍ പറഞ്ഞു. വിളിച്ച നമ്പറില്‍ തിരികെ വിളിച്ചപ്പോള്‍ ഗൂഗിള്‍ പേയില്‍ തന്റെ മുതലാളി പണം നല്‍കുമെന്നുമായിരുന്നു മറുപടി.

എന്നാല്‍ വിളിച്ചയാളെ കാണാതിരിക്കുകയും നാഗമ്പടം സ്റ്റാന്‍ഡില്‍ ആംബുലന്‍സുകള്‍ കൂട്ടത്തോടെ എത്തുക കൂടി ചെയ്തതോടെ തട്ടിപ്പ് പുറത്താകുകയായിരുന്നു. സംഭവത്തില്‍ കോട്ടയം സൈബര്‍ വിഭാഗം അന്വേഷണം ആരംഭിച്ചു