‘നാല് വര്‍ഷം സിനിമയില്‍ ഇല്ലാതിരുന്നിട്ടും അദ്ദേഹത്തിന്റെ സ്റ്റാര്‍ഡം അതുപോലെ നില്‍ക്കുന്നു’; ഷാരൂഖ് ഖാന്‍ പ്രചോദനമെന്ന് തപ്‌സി പന്നു

ബോളിവുഡ് താരം ഷാരൂഖ് ഖാന്‍ ഏറെ പ്രചോദനമെന്ന് നടി തപ്‌സി പന്നു. സിനിമാ പാരമ്പര്യം ഇല്ലാതെ സിനിമയില്‍ വരാന്‍ ആഗ്രഹിക്കുന്നവര്‍ക്ക് അദ്ദേഹം പ്രചോദനമാണ്. സിനിമയില്‍ ജയ പരാജയങ്ങള്‍ ഉണ്ടാകാം. എന്നാല്‍ നാല് വര്‍ഷം സിനിമയില്‍ ഇല്ലാതിരുന്നിട്ടും അദ്ദേഹത്തിന്റെ സ്റ്റാര്‍ഡം അതുപോലെ തന്നെ നിലനില്‍ക്കുകയാണെന്നും തപ്‌സി പന്നു പറഞ്ഞു.

ബോളിവുഡിന് പുറത്തുനിന്ന് സിനിമയെ സ്വപ്‌നം കാണുന്നവര്‍ക്ക് ഷാരൂഖ് ഖാന്‍ പ്രചോദനമാണെന്ന് താന്‍ അദ്ദേഹത്തോട് പറഞ്ഞിട്ടുണ്ടെന്ന് തപ്‌സി പന്നു പറഞ്ഞു. ഷാരൂഖ് ഖാനെപ്പോലെയുള്ള താരങ്ങള്‍ക്കൊപ്പം വര്‍ക്ക് ചെയ്യുമ്പോഴാണ് ശരിക്കും സൂപ്പര്‍സ്റ്റാര്‍ഡം എന്ന വാക്കിന്റെ വലിപ്പം മനസ്സിലാകുന്നത്. നാല വര്‍ഷമായി അദ്ദേഹത്തിന്റെ ഒരു ചിത്രം പോലും പുറത്തിറങ്ങിയിട്ടില്ല. എങ്കിലും അദ്ദേഹം ഒരു പൊതു ഇടത്തില്‍ പ്രത്യക്ഷപ്പെട്ടാല്‍ ഉണ്ടാകുന്ന ഓളം വളരെ വലുതാണെന്നും തപ്‌സി പന്നു കൂട്ടിച്ചേര്‍ത്തു.

രാജ്കുമാര്‍ ഹിറാനി സംവിധാനം ചെയ്യുന്ന ‘ഡങ്കി’യില്‍ ഷാരൂഖിന്റെ നായികയായി എത്തുന്നത് താപ്സി പന്നുവാണ്. നിയമവിരുദ്ധ അനിയന്ത്രിത കുടിയേറ്റമാണ് ചിത്രത്തിന്റെ ഇതിവൃത്തം. റെഡ് ചില്ലീസ് എന്റര്‍ടെയ്ന്‍മെന്റിന്റെയും രാജ്കുമാര്‍ ഫിലിംസിന്റെയും ബാനറില്‍ ഗൗരി ഖാനും രാജ്കുമാര്‍ ഹിറാനിയും ചേര്‍ന്നാണ് സിനിമ നിര്‍മ്മിക്കുന്നത്. ചിത്രം അടുത്ത വര്‍ഷം ഡിസംബര്‍ 22ന് റിലീസ് ചെയ്യും.