അപകടത്തില്‍ മരിച്ച തന്റെ ആരാധകന്റെ വീട്ടില്‍ നേരിട്ട് എത്തി നടന്‍ സൂര്യ

ആരാധകര്‍ ഏറെയുള്ള ഒരു നടനാണ് സൂര്യ. ഒരു തമിഴ് നടന്‍ ആണെങ്കില്‍ പോലും മലയാളത്തില്‍ അടക്കം നിരവധി ഭാഷകളില്‍ സൂര്യയെ ആരാധിച്ചു നടക്കുന്നവര്‍ നിരവധിയാണ്. തന്റെ പ്രിയപ്പെട്ടവര്‍ക്കൊപ്പം ഒത്തുകൂടാനും ഈ നടന്‍ സമയം കണ്ടെത്താറുണ്ട്. ജീവകാരുണ്യ പ്രവര്‍ത്തനങ്ങളിലും സാമൂഹ്യസേവന പ്രവര്‍ത്തനങ്ങളിലും സജീവമാണ് സൂര്യ.

ഇപ്പോള്‍ ഒരു അപകടത്തില്‍ മരിച്ച തന്റെ ആരാധകന്റെ വീട്ടില്‍ എത്തിയിരിക്കുകയാണ് സൂര്യ. സൂര്യ ഫാന്‍സ് ക്ലബ്ബിന്റെ നാമക്കല്‍ ജില്ല സെക്രട്ടറിയായിരുന്ന ജഗദീഷി(27)ന്റെ കുടുംബത്തെയാണ് സൂര്യ ചേര്‍ത്തു പിടിച്ചത്. അപകടത്തില്‍ പരുക്കേറ്റ ജഗദീഷിനെ ആശുപത്രിയിലേക്ക് കൊണ്ടു പോകുന്ന വഴിയാണ് മരണം സംഭവിച്ചത്.

മരണ വിവരം അറിഞ്ഞ് സൂര്യ ആരാധകന്റെ വീട്ടിലെത്തി. അരമണിക്കൂറോളം അവിടെ ചെലവഴിച്ച ശേഷമാണ് താരം മടങ്ങിയത്. ജഗദീഷിന്റെ ഭാര്യയ്ക്ക് ജോലിയും മകളുടെ വിദ്യാഭ്യാസത്തിനുള്ള സഹായവും ഉറപ്പ് നല്‍കിയാണ് താരം മടങ്ങിയത്. എന്ത് ആവശ്യങ്ങള്‍ക്കും തന്നെ വിളിക്കാം എന്നും, കൂടെ ഉണ്ടാകും എന്നും സൂര്യ പറഞ്ഞു. മരണവീട്ടില്‍ എത്തിയ സൂര്യയുടെ ഫോട്ടോ സോഷ്യല്‍ മീഡിയയില്‍ വൈറലായിരിക്കുകയാണ്.

അതേസമയം ഇന്നും കൈനിറയെ സിനിമകളാണ് സൂര്യയ്ക്ക്. കമല്‍ഹാസന്‍ നായകനായി എത്തുന്ന ചിത്രം വിക്രത്തിലും അതിഥിയായി സൂര്യ എത്തുന്നുണ്ട്. സിനിമ ജൂണ്‍ മൂന്നിന് തിയറ്ററുകളിലെത്തും.