മോഹൻലാലിനെ നായകനാക്കി ബി ഉണ്ണികൃഷ്ണൻ സംവിധാനം ചെയ്യുന്ന ഏറ്റവും പുതിയ ചിത്രമാണ് ആറാട്ട്. നെയ്യാറ്റിൻകര ഗോപൻ്റെ ആറാട്ട് എന്നാണ് ചിത്രത്തിൻ്റെ മുഴുവൻ ടൈറ്റിൽ. ഒരു മാസ് ചിത്രമായിരിക്കുമിത് എന്ന് ബി ഉണ്ണികൃഷ്ണൻ നേരത്തെ തന്നെ സൂചന നൽകിയിരുന്നു. ചിത്രത്തിൻറെതായി ഇറങ്ങിയ വീഡിയോകൾ എല്ലാം തന്നെ ഏറെ ശ്രദ്ധ നേടി. ട്രെയിലറിന് മികച്ച പ്രേക്ഷക പ്രതികരണമാണ് ലഭിച്ചതും.
ഇപ്പോഴിതാ ചിത്രത്തിൻ്റെ തീം സോങ് പുറത്തിറങ്ങിയിരിക്കുകയാണ്. രാഹുൽ രാജ് ആണ് ഗാനത്തിന് ഈണം പകർന്നിരിക്കുന്നത്. ഗാനത്തിൻറെ ലിറിക്കൽ വീഡിയോ ആണ് ഇപ്പോൾ പുറത്തിറങ്ങിയത്. ഇത് ആലപിച്ചിരിക്കുന്നത് ആകട്ടെ എംജി ശ്രീകുമാറും ഫെജോയും ചേർന്നാണ്.ഹരിനാരായണനും, ഫെജോയും ചേർന്നാണ് ഇതിന് വരികൾ എഴുതിയിരിക്കുന്നത്. വില്ലൻ എന്ന ചിത്രത്തിന് ശേഷം ബി ഉണ്ണികൃഷ്ണനും മോഹൻലാലും ഒരുമിക്കുന്ന ചിത്രമാണ് ആറാട്ട്. ശ്രദ്ധ ശ്രീനാഥ് ആണ് ചിത്രത്തിൽ നായികയായി എത്തുന്നത്.
ഫെബ്രുവരി 18നാണ് ചിത്രം തിയേറ്ററുകളിൽ പ്രദർശനത്തിനെത്തുക. ചിത്രത്തിൽ സംഗീത മാന്ത്രികനായ എ ആർ റഹ്മാനും അതിഥി വേഷത്തിലെത്തുന്നുണ്ട് എന്നത് പ്രത്യേകതയാണ്. ഉദയ്കൃഷ്ണയാണ് ചിത്രത്തിന് വേണ്ടി തിരക്കഥ ഒരുക്കുന്നത്. പുലിമുരുകൻ എന്ന ബ്ലോക്ക് ബസ്റ്റർ ചിത്രത്തിനുശേഷം മോഹൻലാലിനുവേണ്ടി ഉദയ്കൃഷ്ണ വീണ്ടും തിരക്കഥ ഒരുക്കുന്നു എന്ന പ്രത്യേകതയുമുണ്ട്. വിജയ് ഉലകനാഥ് ആണ് ഇതിന് ഛായാഗ്രഹണം നിർവഹിക്കുന്നത്.ആർ ഡീ ഇല്യുമിനേഷൻസും, ശക്തി (എം. പി. എം ഗ്രൂപ്പ്) ചേർന്നാണ് ചിത്രം നിർമ്മിക്കുന്നത്.
പുറത്തിറങ്ങിയ ഗാനം എന്തായാലും ആരാധകരിൽ രോമാഞ്ചം ഉണർത്തുകയാണ്. കമൻറ് ബോക്സിലെ കമൻറുകൾ തന്നെയാണ് ഇതിനു തെളിവ്. മോഹൻലാൽ ആരാധകർ അടക്കം എല്ലാവരും വളരെ പ്രതീക്ഷയോടെയാണ് ചിത്രത്തെ നോക്കിക്കാണുന്നത്. ഒരു ചെറിയ ഇടവേളക്ക് ശേഷം പക്കാ മാസ്സ് റോളിൽ മലയാളികളുടെ സ്വന്തം ലാലേട്ടൻ എത്തുന്ന ചിത്രം കൂടിയാണ് ഇത്. ഈ ഗാനത്തിലെ വരികൾ പറയുന്നതുപോലെ തലയുടെ വിളയാട്ടം ചിത്രത്തിലുടനീളം കാണുവാൻ സാധിക്കും എന്ന് തന്നെയാണ് പ്രേക്ഷകർ കരുതുന്നത്.