മുംബൈ:ഹിന്ദി സീരിയലുകളിലൂടെ പ്രേക്ഷക പ്രീതി നേടിയ നടൻ സിദ്ധാന്ത് വീര് സൂര്യവംശി അന്തരിച്ചു.ജിമ്മിൽ വ്യായാമം ചെയ്യുന്നതിനിടെ നടന് ദേഹാസ്വാസ്ഥ്യം അനുഭവപ്പെട്ട് കുഴഞ്ഞു വീഴുകയായിരുന്നു.
ഉടൻ തന്നെ ആശുപത്രിയിൽ എത്തിച്ചെങ്കിലും ജീവന് രക്ഷിക്കാനായില്ല.46 വയസ്സായിരുന്നു.ഹൃദയാഘാതമാണ് മരണകാരണമെന്നാണ് പ്രാഥമിക നിഗമനം.
മോഡലിംഗിൽ നിന്നും അഭിനയ മേഖലയിലേക്ക് എത്തിയ താരമാണ് സിദ്ധാന്ത്. ഏക്ത കപൂര് നിര്മിച്ച ഖുസും എന്ന സീരിയലിലൂടെയാണ് മിനിസ്ക്രീനിൽ അരങ്ങേറ്റം കുറിച്ചത് .
ശേഷം വന്ന സമീന് സേ ആസ്മാന് തക്, വിരുദ്ധ്, ഭാഗ്യവിധാത, മംമ്ത, ഖയാമത്ത് തുടങ്ങിയ സീരിയലുകളിലൂടെ സിദ്ധാന്ത് പ്രേക്ഷകരുടെ പ്രിയ താരമായി മാറി.
2007ല് ഇന്ത്യന് ടെലിവിഷൻ പുരസ്കാരവും നടന് ലഭിച്ചിരുന്നു.ഇറ ചൗധരിയാണ് സിദ്ധാന്തിന്റെ ആദ്യ ഭാര്യ. 2015ൽ ഇരുവരും വിവാഹബന്ധം വേർപെടുത്തിയിരുന്നു. ശേഷം 2017ൽ മോഡലും ഫാഷൻ കൊറിയോഗ്രാഫറുമായ അലീസിയ റാവത്തിനെ നടൻ വിവാഹം കഴിച്ചു.
ബോളിവുഡ് താരങ്ങൾ ഉൾപ്പെടെ നിരവധി പേരാണ് താരത്തിന്റെ നിര്യാണത്തിൽ ആദരാഞ്ജലികൾ അർപ്പിച്ച് എത്തിയത്.
46–ാം വയസ്സിൽ കന്നഡ നടൻ പുനീത് രാജ്കുമാർ, 40–ാം വയസ്സിൽ ബോളിവുഡ്, സീരിയൽ നടൻ സിദ്ധാർഥ് ശുക്ല, 41–ാം വയസ്സിൽ നടൻ ദീപേഷ് ഭാൻ തുടങ്ങിയവരുടെ മരണത്തിന് അമിതവ്യായാമം കാരണമായെന്ന റിപ്പോർട്ടുകൾക്കിടെയാണ് മറ്റൊരു നടൻ കൂടി അതേ സാഹചര്യത്തിൽ ഓർമയായത്.