പബ്ജിക്ക് അടിമയായ 14 കാരൻ അമ്മയെയും സഹോദരങ്ങളെയും വെടിവച്ചു കൊന്നു

അമ്മയും സഹോദരിമാരുമടക്കം കുടുംബത്തിലെ എല്ലാവരെയും വെടിവച്ച് കൊന്ന് 14കാരൻ. പാകിസ്താൻ നഗരമായ ലാഹോറിലാണ് സംഭവം. പബ്ജി ഗെയിമിന് അടിമയാണ് കുട്ടിയെന്നാണ് വിവരം.

45കാരിയായ മാതാവ് നഹീദ് മുബാറക്, 22കാരനായ സഹോദരൻ, 17ഉം 11ഉം വയസുള്ള രണ്ട് സഹോദരിമാർ എന്നിവരെയാണ് 14കാരൻ വെടിവച്ച് കൊന്നത്. പബ്ജി ഗെയിമിൽനിന്ന് പ്രചോദനമുൾക്കൊണ്ടാണ് കൊല നടത്തിയതെന്ന് കുട്ടി പൊലീസിനോട് സമ്മതിച്ചിട്ടുണ്ട്. മണക്കൂറുകളോളം ഓൺലൈനിൽ ഗെയിമിനു വേണ്ടി ചെലവഴിച്ച് മാനസിക പ്രശ്‌നങ്ങൾക്കിരയായിരുന്നു 14കാരനെന്ന് പൊലീസ് പറഞ്ഞു.

വിവാഹമോചിതയാണ് നഹീദ്. മക്കളെല്ലാം അവർക്കൊപ്പമാണ് കഴിയുന്നത്. പഠനത്തിൽ ഒട്ടും ശ്രദ്ധിക്കാതെ മുഴുവൻ സമയവും പബ്ജി ഗെയിമുമായി കഴിയുന്നതു കാരണം 14കാരനെ നഹീദ് പലപ്പോഴും ശകാരിക്കാറുണ്ടായിരുന്നു. സംഭവം നടന്ന ദിവസം രാത്രിയും പതിവുപോലെ അമ്മ ശകാരിച്ചപ്പോഴാണ് വീട്ടിലുണ്ടായിരുന്ന തോക്കെടുത്ത് വെടിവച്ചത്. നഹീദിനു പിന്നാലെ ഉറക്കത്തിലായിരുന്ന മൂന്നു സഹോദരങ്ങളെയും വെടിവച്ചു. എല്ലാവരും തൽക്ഷണം മരിക്കുകയും ചെയ്തു. രാവിലെയാണ് വിവരം അയൽവാസികൾ അറിയുന്നത്. ഇവർ നൽകിയ വിവരത്തിന്റെ അടിസ്ഥാനത്തിൽ സ്ഥലത്തെത്തി പൊലീസ് 14കാരനെ അറസ്റ്റ് ചെയ്യുകയായിരുന്നു.