എല്ലാം ഗുരുവായൂരപ്പന്റെ അനുഗ്രഹമെന്ന് ഗുരുവായൂര്‍ ക്ഷേത്രത്തില്‍ വഴിപാടായി ലഭിച്ച മഹീന്ദ്ര ഥാര്‍ പുനര്‍ലേലത്തില്‍ സ്വന്തമാക്കിയ പ്രവാസി മലയാളി വിഘ്‌നേഷ് വിജയകുമാര്‍. ഗുരുവായൂരപ്പന്റെ വലിയ ഭക്തനാണ് താനെന്നും മാസത്തിലൊരിക്കല്‍ ക്ഷേത്രത്തില്‍ തൊഴാന്‍ പോകാറുണ്ടെന്നും വിഘ്‌നേഷ് പറഞ്ഞു. 43 ലക്ഷത്തിനാണ് ഥാര്‍ വിഘ്‌നേഷ് സ്വന്തമാക്കിയത്.
18 വര്‍ഷമായി ദുബായില്‍ ബിസിനസ് നടത്തിവരികയാണ് വിഘ്‌നേഷ്. ഗ്ലോബല്‍ സ്മാര്‍ട്ട് ബിസിനസ് ഗ്രൂപ്പ് എന്ന പേരിലായിരുന്നു അദ്ദേഹത്തിന്റെ ആദ്യ ബിസിനസ്. ഇപ്പോള്‍ വെല്‍ ഐ എന്ന പേരില്‍ പുതിയ ബിസിനസ് ആരംഭിച്ചിട്ടുണ്ട്. വിഘ്‌നേഷ് ഒന്നിലധികം കമ്പനികളുടെ ചെയര്‍മാനാണ്. മലപ്പുറത്ത് ട്രിനിറ്റി എന്ന് പേരുള്ള ഹോഴ്‌സ് ക്ലബുമുണ്ട്.
തിങ്കളാഴ്ച മേല്‍പ്പത്തൂര്‍ ഓഡിറ്റോറിയത്തില്‍ നടന്ന പുനര്‍ലേലത്തില്‍ ആകെ പതിനഞ്ച് പേരാണ് പങ്കെടുത്തത്. പതിനഞ്ച് ലക്ഷമായിരുന്നു വാഹനത്തിന് നിശ്ചയിച്ചിരുന്ന അടിസ്ഥാന വില. 43 ലക്ഷത്തിന് പുറമേ ജിഎസ്ടിയും വിഘ്‌നേഷ് നല്‍കണം.
