ജയറാം നായകനായ വീണ്ടും ചില വീട്ടുകാര്യങ്ങള്‍ എന്ന ചിത്രത്തിലൂടെ വെള്ളിത്തിരയില്‍ എത്തിയ താരമാണ് സംയുക്ത വര്‍മ്മ. നടി 18 ചിത്രങ്ങളില്‍ അഭിനയിച്ചു. ഇതില്‍ കൂടുതല്‍ ചിത്രങ്ങളിലും സുരേഷ് ഗോപിയായിരുന്നു നായകന്‍. മിക്ക ചിത്രങ്ങളും ഹിറ്റ് ചാര്‍ട്ടില്‍ ഇടം നേടി എന്നതാണ് മറ്റൊരു കാര്യം.
ബിജു മേനോന്‍ നായകനായ മഴ, മധുരനൊമ്പരക്കാറ്റ്, മേഘമല്‍ഹാര്‍ എന്നീ ചിത്രങ്ങളും സംയുക്ത വര്‍മ്മയുടെ അഭിനയമികവ് തെളിയിക്കുന്ന ചിത്രങ്ങളായിരുന്നു. വിവാഹത്തോടെ അഭിനയത്തില്‍ നിന്നും മാറി നിന്നു.
ചെറിയമ്മയായ ഊര്‍മ്മിള ഉണ്ണിക്ക് പിന്നാലെയായാണ് സംയുക്ത സിനിമയിലെത്തിയത്. സംയുക്തയെ കുറിച്ച് നേരത്തെ ഊര്‍മ്മിള പറഞ്ഞ വാക്കുകളും വൈറല്‍ ആയിരുന്നു. താത്തതേയ് എന്നാണ് സംയുക്ത ഊര്‍മ്മിളയെ വിളിക്കുന്നത്. പഞ്ചാരേയെന്നും താന്‍ ചിന്നുവിനെ വിളിക്കാറുണ്ടെന്ന് നേരത്തെ ഊര്‍മ്മിള ഉണ്ണി പറഞ്ഞിരുന്നു.
ഊര്‍മ്മിള ഉണ്ണിയുടെ മകളായ ഉത്തര ഉണ്ണിയുടെ വിവാഹത്തിന് മുന്നില്‍ തന്നെ സംയുക്ത ഉണ്ടായിരുന്നു. ഈ ദിനത്തില്‍ നടി ധരിച്ച ആഭരണങ്ങളെ കുറിച്ചും സാരിയെ കുറിച്ചെല്ലാം വലിയ ചര്‍ച്ച തന്നെ സോഷ്യല്‍ മീഡിയയില്‍ നടന്നിരുന്നു. തനിക്ക് വലിയ മാലയോടും കമ്മലിനോടും ഉള്ള ഇഷ്ടത്തെ കുറിച്ചും സംയുക്ത പറഞ്ഞിരുന്നു. വിവാഹത്തോടെ സിനിമയില്‍ നിന്നും മാറി നിന്ന താരം ഈ അടുത്ത് അഭിമുഖം കൊടുത്തിരുന്നു.
ഇപ്പോഴിതാ സംയുക്തയും ഉത്തരയും ഒന്നിച്ചുള്ള ചിത്രവുമായെത്തിയിരിക്കുകയാണ് ഊര്‍മ്മിള ഉണ്ണി. ചില ഇഷ്ടങ്ങള്‍ കാലാകാലങ്ങളായി തുടരുമെന്ന ക്യാപ്ഷനോടെയായാണ് ചിത്രം പോസ്റ്റ് ചെയ്തത്. പണ്ടത്തെയും ഇപ്പോഴത്തെയും ചിത്രങ്ങളായിരുന്നു താരം പോസ്റ്റ് ചെയ്തത്. ഫോട്ടോ ആരാധകരും ഏറ്റെടുത്തിരിക്കുകയാണ്. ചിത്രത്തിന് താഴെ സ്‌നേഹം അറിയിച്ച് ആരാധകരും എത്തി.
