ഹനീഫ് അദേനി തിരക്കഥയെഴുതി സംവിധാനം ചെയ്ത ഉണ്ണി മുകുന്ദന് ചിത്രം ‘മാര്ക്കോ’ ബോക്സോഫീസില് വമ്പിച്ച നേട്ടം കൊയ്യുകയാണ്. ഉണ്ണി മുകുന്ദന്റെ കരിയറിലെ തന്നെ ഏറ്റവും വലിയ ഓപ്പണിംഗ് ആണ് വെള്ളിയാഴ്ച പുറത്തിറങ്ങിയ ചിത്രത്തിന് ബോക്സോഫീസില് ലഭിച്ചത്. ഇപ്പോഴിതാ മാര്ക്കോയിലെ പുതിയ വീഡിയോ സോങ് റിലീസ് ചെയ്തിരിക്കുകയാണ്. ‘ദ ഫാമിലി മാന്’ എന്ന പേരിലുള്ള ഗാനത്തിനു സംഗീതം നല്കിയിരിക്കുന്നത് രവി ബസ്രൂര് ആണ്. വിനായക് ശശികുമാറിന്റെ വരികള് ആലപിച്ചിരിക്കുന്നത് ജിതിന് രാജ് ആണ്. പതിനെട്ടു വയസ്സിനു മുകളിലുള്ള ഏതൊരു കുടുംബപ്രേക്ഷകര്ക്കും കാണാവുന്ന. ഏറെ രസിപ്പിക്കുന്ന അനുഭവമായിരിക്കും മാര്ക്കോ എന്നാണ് ‘സ്നേഹിക്കുന്നവര്ക്കുവേണ്ടി നിങ്ങള് ഏതറ്റം വരെ പോകും’ എന്ന ടാഗ് ലൈനോടെ പുറത്തിറങ്ങിയ ഗാനം സൂചിപ്പിക്കുന്നത്.
തന്റെ കരിയറിലെ ഏറ്റവും വലിയ സിനിമയുമായി എത്തുമ്പോള് ചിത്രത്തെ കുറിച്ച് ഹൈപ്പ് പതിന്മടങ്ങായി വര്ദ്ധിച്ചിട്ടുമുണ്ട്. ക്യൂബ്സ് എന്റര്ടെയ്ന്മെന്റ്സ്, ഉണ്ണി മുകുന്ദന് ഫിലിംസ് എന്നീ ബാനറുകളില് ഷെരീഫ് മുഹമ്മദ് നിര്മ്മിക്കുന്ന ചിത്രത്തിലെ ഗാനങ്ങള് ഏറെ ശ്രദ്ധിക്കപ്പെട്ടിരുന്നു. മലയാളം ഇതുവരെ കാണാത്ത വിധത്തിലുള്ള മോസ്റ്റ് വയലന്റ് ഫിലിം എന്ന ലേബലില് എത്തുന്ന ‘മാര്ക്കോ’യുടെ സംഗീതമൊരുക്കുന്നത് ‘കെ.ജി.എഫ്’, ‘സലാര്’ എന്നീ ബ്രഹ്മാണ്ഡ ചിത്രങ്ങളുടെ സംഗീത സംവിധായകന് രവി ബസ്രൂര് ആണ്. ചിത്രത്തിന്റെ മ്യൂസിക് റൈറ്റ്സ് സോണി മ്യൂസിക്ക് ആണ് സ്വന്തമാക്കിയിരിക്കുന്നത്. അസാധാരണമായ വയലന്സ് രംഗങ്ങളും ഹെവി മാസ് ആക്ഷനുമായി ‘മാര്ക്കോ’ 5 ഭാഷകളിലാണ് റിലീസ് ചെയ്തിരിക്കുന്നത്. ആക്ഷന് വലിയ പ്രാധാന്യം ഒരുക്കിയിരിക്കുന്ന സിനിമയിലെ സംഘട്ടനങ്ങള് ഒരുക്കിയിരിക്കുന്നത് പ്രമുഖ ആക്ഷന് ഡയറക്ടര് കലൈ കിങ്ങ്സ്റ്റണാണ്. ചിത്രത്തിനായി ഏഴോളം ഫൈറ്റ് സീക്വന്സുകളാണ് കലൈ കിങ്ങ്സ്റ്റണ് ഒരുക്കിയിരിക്കുന്നത്.