മലയാളത്തിലെ യുവ താരങ്ങളിൽ ഏറെ ആരാധകരുള്ള താരമാണ് ഉണ്ണി മുകുന്ദൻ. കൈ നിറയെ ചിത്രങ്ങളും ഹിറ്റുകളും സമ്മാനിച്ച് കരിയറിന്റെ ഉയർച്ചയിലേക്ക് കുതിക്കുന്ന താരമാണ് ഉണ്ണി.
ഉണ്ണി മുകുന്ദാന്റെതായി പ്രേക്ഷകർ പ്രതീക്ഷയോടെ കാത്തിരുന്ന ചിത്രമാണ് ബ്രൂസ് ലീ. വൈശാഖ് സംവിധാനം ചെയ്യുന്ന ചിത്രം നേരത്തെ പ്രഖ്യാപിച്ചിരുന്നു.
ആക്ഷൻ ചിത്രമായി ഒരുങ്ങുമെന്ന് അറിയിച്ചിരുന്ന ചിത്രത്തിന് വേണ്ടി പ്രതീക്ഷയോടെ കാത്തിരിക്കയായിരുന്നു താരത്തിന്റെ ആരാധകർ.
എന്നാൽ ഇപ്പോഴിതാ ആരാധകർക്ക് നിരാശ നൽകുന്ന വാർത്ത പങ്കിവച്ചു എത്തിയിരിക്കുകയാണ് ഉണ്ണി മുകുന്ദൻ.
ബ്രൂസ് ലി ഉപേക്ഷിച്ചു എന്നാണ് ഉണ്ണി ആരാധകരെ അറിയിച്ചിരിക്കുന്നത്.
രഞ്ജിത്ത് ശങ്കറിന്‍റെ സംവിധാനത്തിലെത്തുന്ന തന്‍റെ പുതിയ ചിത്രം ജയ് ഗണേഷ് സംബന്ധിച്ച ഒരു പോസ്റ്റ് കഴിഞ്ഞ ദിവസം ഉണ്ണി ഫേസ്ബുക്കില്‍ ഇട്ടിരുന്നു. ഇതിന് താഴെയുള്ള ആരാധകരുടെ ചോദ്യത്തിന് മറുപടിയായാണ് ബ്രൂസ് ലീ ഉപേക്ഷിച്ചതായി ഉണ്ണി അറിയിച്ചത്.
ബ്രൂസ് ലീ ഉപേക്ഷിച്ചോ എന്ന ചോദ്യത്തിന് ഉണ്ണിയുടെ മറുപടി ഇങ്ങനെ- “അതെ സുഹൃത്തേ. ദൌര്‍ഭാഗ്യവശാല്‍ ബ്രൂസ് ലീ ഉപേക്ഷിക്കേണ്ടിവന്നു. ക്രിയേറ്റീവ് ആയ കാരണങ്ങളാലാണ് അത് വേണ്ടിവന്നത്. പക്ഷേ അതേ ടീം മറ്റൊരു പ്രോജക്റ്റിനുവേണ്ടിയുള്ള ജോലികളിലാണ്.
അത് ഒരു ആക്ഷന്‍ ചിത്രമാവാനാണ് സാധ്യത. കാലം എന്താണോ ഡിമാന്‍ഡ് ചെയ്യുന്നത് അതനുസരിച്ചാവും ആ ചിത്രം”. അടുത്ത വര്‍ഷം ഒരു ആക്ഷന്‍ ചിത്രം വരുമെന്നും ഉണ്ണി പറയുന്നുണ്ട്.
2022 ലെ ഉണ്ണി മുകുന്ദന്‍റെ പിറന്നാള്‍ ദിനത്തിലായിരുന്നു ബ്രൂസ് ലീയുടെ പ്രഖ്യാപനം. ഉദയകൃഷ്ണയാണ് ഈ ചിത്രത്തിന് തിരക്കഥ ഒരുക്കേണ്ടിയിരുന്നത്. നേരത്തെ ഉണ്ണി മുകുന്ദനെ നായകനാക്കി വൈശാഖ് സംവിധാനം ചെയ്ത മല്ലു സിംഗ് എന്ന ചിത്രം ബോക്സ് ഓഫീസില്‍ വിജയം നേടിയ ചിത്രമാണ്.
അതേസമയം ജയ് ഗണേഷിനൊപ്പം ഗന്ധര്‍വ്വ ജൂനിയറും ഉണ്ണി മുകുന്ദന്‍റേതായി പ്രഖ്യാപിക്കപ്പെട്ടിട്ടുണ്ട്. ഒപ്പം തമിഴില്‍ കരുടന്‍ എന്ന ചിത്രവും ഒരുങ്ങുന്നുണ്ട്.
