മലയാളത്തിലെ മുൻ നിര നായകനായി വളരുകയാണ് ടോവിനോ തോമസ് ഇന്ന്. കഠിനാദ്ധ്വാനത്തിലൂടെയും സ്വപ്രയത്നത്തിലൂടെയും ആണ് താരം വളർന്നത്. മോഡലിംഗിൽ നിന്ന് ആണ് താരം സിനിമയിലേക്കെത്തുന്നത്. പ്രഭുവിൻ്റെ മക്കൾ എന്ന ചിത്രത്തിലൂടെയാണ് ടോവിനോയുടെ രംഗ പ്രവേശം. ചെറിയ വേഷങ്ങൾ ചെയ്തും സഹ നടൻ ആയും പടിപടിയായി താരം വളർന്നു.
അങ്ങനെയാണ് പിന്നീട് നായക വേഷങ്ങൾ ചെയ്യാൻ തുടങ്ങിയത്. എന്നു നിൻറെ മൊയ്തീൻ എന്ന ചിത്രമാണ് ടോവിനോയുടെ കരിയറിൽ വഴിത്തിരിവായത്. പൃഥ്വിരാജ് ആയിരുന്നു ഈ ചിത്രത്തിൽ നായകൻ. ആർഎസ് വിമൽ സംവിധാനം ചെയ്ത ചിത്രമാണിത്. ഇത് ഒരു സൂപ്പർ ഹിറ്റ് ആയതോടെ ടോവിനോയ്ക്ക് മുന്നിൽ വഴികൾ തെളിഞ്ഞു. പിന്നീട് താരം ചെയ്ത മെക്സിക്കൻ അപാരത എന്ന ചിത്രം ഹിറ്റായി. ഇതോടെ മലയാള സിനിമയുടെ മുൻ നിരയിലേക്ക് വരുകയായിരുന്നു താരം.
ചാർലി എന്ന ചിത്രത്തിലും ടോവിനോ ഒരു ചെറിയ വേഷം അവതരിപ്പിച്ചിരുന്നു. ദുൽഖർ സൽമാൻ ആയിരുന്നു ചിത്രത്തിൽ നായകൻ. മാർട്ടിൻ പ്രക്കാട്ട് സംവിധാനം ചെയ്ത ചിത്രം സൂപ്പർ ഹിറ്റായി. ഈ ചിത്രത്തിൽ ജോർജ്ജി എന്ന അതിഥി കഥാപാത്രമായാണ് ടോവിനോ എത്തിയത്. അതിൽ അഭിനയിച്ച അനുഭവം പറയുകയാണ് ടോവിനോ.
താൻ ഏറ്റവും കൂടുതൽ റീ ടേക്കുകൾ എടുത്ത് അഭിനയിച്ച ചിത്രമായിരുന്നു ചാർലി. ഒരുപാട് പ്രശ്നങ്ങൾ ഉണ്ടായിരുന്നു ആ സമയത്ത്. അതിനു മുൻപ് അഭിനയിച്ച ചില ചിത്രങ്ങൾ ഒന്നും വേണ്ടത്ര ശ്രദ്ധ നേടിയിരുന്നില്ല. എന്ന് നിൻറെ മൊയ്തീൻ റിലീസ് ആയിട്ടില്ല. ഭാര്യ ഗർഭിണിയായിരുന്നു അന്ന്. ഹോസ്പിറ്റൽ ചെലവിനും മറ്റുമായി കയ്യിൽ 10 പൈസയും ഇല്ല. അങ്ങനെയാണ് ചാർലിയിൽ അതിഥി വേഷം ചെയ്യാൻ എത്തുന്നത് . ഈ പ്രശ്നങ്ങൾ ഒക്കെ തന്നെയും അഭിനയത്തെയും ബാധിച്ചു. നെടുമുടി ചേട്ടനെ പോലുള്ള സീനിയർ നടന്മാർക്ക് മുന്നിൽ അഭിനയിക്കുന്നതിൻ്റെ ടെൻഷൻ വേറെയും. ആർക്കും വളരെ ഈസിയായി പറയാവുന്ന ഒരു ഡയലോഗ് 15 ടേക്ക് എടുത്തിട്ടാണ് ശരിയായത്. പിന്നീട് നെടുമുടി വേണു ചേട്ടനൊപ്പം അഭിനയിക്കുമ്പോൾ തനിക്ക് അതിൻറെ ചമ്മൽ ഉണ്ടായിരുന്നു എന്നും താരം പറഞ്ഞു.
