ആധുനിക റെട്രോ ക്ലാസിക് മോട്ടോര്‍സൈക്കിളുകളില്‍, ഏറ്റവും ശക്തമായ ബ്രാന്‍ഡുകളില്‍ ഒന്നാണ് റോയല്‍ എന്‍ഫീല്‍ഡ്. ബജാജും യെസ്ഡിയും ജാവയും ഹോണ്ടയും തങ്ങളുടേതായ രീതിയില്‍ വിജയിച്ചിട്ടുണ്ടെങ്കിലും, റോയല്‍ എന്‍ഫീല്‍ഡ് ഈ വിഭാഗത്തില്‍ ഒരുപടി മുന്നിലാണെന്ന് വേണം പറയാന്‍. എന്‍ഫീല്‍ഡ് അതിന്റെ ആധിപത്യം വിജയകരമായി നിലനിറുത്തുകയും വിഭാഗത്തില്‍ ശക്തമായി മത്സരം കാഴ്ചവെയ്ക്കുകയും ചെയ്യുന്നു. റോയല്‍ എന്‍ഫീല്‍ഡ് എന്ന പേര് ലോകമെമ്പാടുമുള്ള മോട്ടോര്‍സൈക്കിള്‍ ആരാധകരില്‍ ഒരു പ്രത്യേക ഗൃഹാതുരത്വം ഉണര്‍ത്തുകയും ചെയ്യുന്നു.
ഇപ്പോഴിതാ തങ്ങളുടെ ഉപഭോക്താക്കള്‍ക്കായി പുതിയ പദ്ധതികള്‍ അവതരിപ്പിച്ചിരിക്കുകയാണ് കമ്പനി. പുതിയ ഡിജിറ്റല്‍ റോഡ്‌സൈഡ് അസിസ്റ്റ് സമാരംഭിച്ചതോടെ, റോയല്‍ എന്‍ഫീല്‍ഡ് മോഡലുകള്‍ പരിപാലിക്കുന്നതും പിന്തുണ നേടുന്നതും മുമ്പത്തേക്കാള്‍ എളുപ്പമാണെന്ന് വേണം പറയാന്‍. താരതമ്യേന വിശാലമായ ഡീലര്‍ ശൃംഖലയില്‍ നിന്ന് ഉപഭോക്താക്കള്‍ക്ക് കൂടുതല്‍ മൂല്യം വാഗ്ദാനം ചെയ്യുന്നതിനായി, റോയല്‍ എന്‍ഫീല്‍ഡ് ഇന്ത്യയിലും വിദേശ വിപണികളിലും 24X7 RSA (റോഡ്‌സൈഡ് അസിസ്റ്റന്‍സ്) സേവനങ്ങള്‍ ആരംഭിച്ചിരുന്നു.
ഇതുവരെ, RSA ലഭിക്കുന്നതിന്, നിങ്ങള്‍ അവരുടെ കസ്റ്റമര്‍ കെയറിനെ വിളിക്കേണ്ടതുണ്ടായിരുന്നു. എന്നാല്‍ ഇപ്പോള്‍, ഡിജിറ്റല്‍ RSA ഉപയോഗിച്ച് പ്രക്രിയ വളരെ ലളിതമാക്കിയിരിക്കുകയാണ് റോയല്‍ എന്‍ഫീല്‍ഡ്. സാധുതയുള്ള RSA ഉള്ള റോയല്‍ എന്‍ഫീല്‍ഡ് മോട്ടോര്‍സൈക്കിളുകളുടെ (ബുള്ളറ്റ്, മീറ്റിയോര്‍, ക്ലാസിക്, ഇലക്ട്ര, 650 ട്വിന്‍സ്, ഹിമാലയന്‍) ഉടമകള്‍ക്ക് ഇപ്പോള്‍ ഒരു ബട്ടണ്‍ അമര്‍ത്തിയാല്‍ സഹായം ലഭിക്കും. RSA അനുസരിച്ച്, ദേശീയ പാതകളിലോ സംസ്ഥാന പാതകളിലോ ഇന്ത്യയുടെ പ്രധാന ഭൂപ്രദേശത്തിനകത്തുള്ള മോട്ടോര്‍ വാഹന റോഡുകളിലോ എവിടെയും സംഭവിക്കുന്ന മെക്കാനിക്കല്‍, ഇലക്ട്രിക്കല്‍, ക്രാഷ് സംഭവങ്ങള്‍ സ്ഥലത്തുതന്നെ കൈകാര്യം ചെയ്യുകയോ ആവശ്യമെങ്കില്‍ അടുത്തുള്ള സര്‍വീസ് സ്റ്റേഷനിലേക്ക് കൊണ്ടുപോകുകയോ ചെയ്യും.
