ഉത്ര കൊലക്കേസിൽ ഇന്ന് ആയിരുന്നു വിധി വന്നത്. ഭർത്താവ് സൂരജ് കുറ്റക്കാരനാണെന്ന് കോടതി കണ്ടെത്തി. രണ്ടു ദിവസത്തിനകം ശിക്ഷ പ്രഖ്യാപിക്കും. സൂരജിന് വധശിക്ഷ ലഭിക്കണമെന്നാണ് എല്ലാവരും ഒരുപോലെ ആഗ്രഹിക്കുന്നത്. എന്നാൽ അത് ഉണ്ടാവില്ല എന്നും ഇരട്ടജീവപര്യന്തം ആയിരിക്കും പരമാവധി ലഭിക്കുക എന്നുമാണ് അറിയാൻ സാധിക്കുന്നത്. അപൂർവങ്ങളിൽ അപൂർവമായ കേസ് ആണ് ഇത്, അതുകൊണ്ട് വധശിക്ഷയ്ക്ക് ഉള്ള സാധ്യത തള്ളിക്കളയാൻ സാധിക്കില്ല.
ഇപ്പോൾ സൂരജിൻ്റെ അച്ഛൻറെയും അമ്മയുടെയും പണ്ടത്തെ പ്രതികരണമാണ് ശ്രദ്ധിക്കപ്പെടുന്നത്. കുറ്റം ഒന്നും ചെയ്തിട്ടില്ല എന്ന് ആവർത്തിച്ചു പറയുകയായിരുന്നു അവർ. എന്നാൽ ഇന്ന് പ്രതികരിക്കാൻ പോലും ഇവർക്ക് സാധിക്കുന്നില്ല. വിധത്തിൽ മൗനത്തിലായിരുന്നു ഇവർ. അടൂർ പറക്കോട് ശ്രീ സൂര്യ വീട്ടിലാണ് ഇവർ താമസിക്കുന്നത്. അടുത്ത അയൽവാസികളോട് പോലും ഇവർക്ക് ഇപ്പോൾ ബന്ധമില്ല. പൂർണമായും ഒറ്റപ്പെട്ടു കൊണ്ടാണ് ഇവർ ഇപ്പോൾ താമസിക്കുന്നത്.
പാമ്പിനെ ഉപയോഗിച്ചുള്ള കൊലപാതകമായിരുന്നു ഇത്. ഇന്ത്യയിൽ രണ്ടാമത്തെ സംഭവം, കേരളത്തിൽ ആദ്യമായും. സമാനതകളില്ലാത്ത തിരക്കഥ ആയിരുന്നു സൂരജ് ഈ കൊലപാതകത്തിന് വേണ്ടി ഉപയോഗിച്ചത്. പക്ഷേ ഇതൊക്കെ പുറത്തു വന്നപ്പോഴും മകനെ ന്യായീകരിക്കുക ആയിരുന്നു അച്ഛൻ സുരേന്ദ്രനും അമ്മ രേണുകയും. “അവൻ ചെയ്യത്തില്ല, അവിടെ അടിച്ചു പറയിപ്പിച്ചതാണ് ഇത്. അവൻ ഇന്ന് കരഞ്ഞുകൊണ്ട് പറഞ്ഞല്ലോ ഞാൻ കുറ്റം ചെയ്തിട്ടില്ല എന്ന്” – ഇതായിരുന്നു അമ്മയുടെ അന്നത്തെ പ്രതികരണം.
ഉത്രയുടെ ആഭരണങ്ങൾ വീട്ടുവളപ്പിൽ കുഴിച്ചിട്ട നിലയിൽ കണ്ടെത്തിയിരുന്നു. ഇതിനു ശേഷമായിരുന്നു വീട്ടുകാർ പോലും സംശയനിഴലിൽ വന്നത്. ഇതിനുശേഷം ഇവർ പിന്നീട് പരസ്യ പ്രതികരണങ്ങൾക്ക് ഒന്നുംതന്നെ തയ്യാറായിട്ടില്ല. വനം വകുപ്പ് ഉദ്യോഗസ്ഥർ സൂരജിനെ തെളിവെടുപ്പിന് വേണ്ടി എത്തിച്ചപ്പോൾ ആയിരുന്നു താൻ ആണ് കൊലപാതകം ചെയ്തത് എന്ന് സൂരജ് ആദ്യമായി പരസ്യപ്രസ്താവന നടത്തിയത്. കൊലപാതകത്തിന് അനുബന്ധമായി ഗാർഹിക പീഡന കേസ് രജിസ്റ്റർ ചെയ്തിട്ടുണ്ട്. ഇതിൽ അച്ഛനുമമ്മയും സൂരജിൻ്റെ സഹോദരിയും പ്രതികളാണ്.
