കെപിസിസി അധ്യക്ഷനെ തെരഞ്ഞെടുക്കാന്‍ സോണിയ ഗാന്ധി. അധ്യക്ഷനെ തെരഞ്ഞെടുക്കാന്‍ സോണിയാ ഗാന്ധിയെ ചുമതലപ്പെടുത്തിക്കൊണ്ടുള്ള പ്രമേയം പാസാക്കി. കെപിസിസി യോഗത്തില്‍ രമേശ് ചെന്നിത്തലയാണ് പ്രമേയം പാസാക്കിയത്. വി ഡി സതീശന്‍, കെ മുരളീധരന്‍, എം എം ഹസന്‍, കൊടിക്കുന്നില്‍ സുരേഷ് തുടങ്ങിയവര്‍ ഇതിനെ പിന്തുണച്ചു.
കെപിസിസി അധ്യക്ഷനെ തെരഞ്ഞെടുക്കണം എന്ന് എഐസിസിയോട് ആവശ്യപ്പെടുന്ന ഒറ്റവരി പ്രമേയമാണ് യോഗത്തില്‍ അവതരിപ്പിച്ചത്. പുതുതായി തെരഞ്ഞെടുക്കപ്പെട്ട കെപിസിസി അംഗങ്ങള്‍ പങ്കെടുത്ത ആദ്യ ജനറല്‍ ബോഡി യോഗമാണ് ഇന്ന് ചേര്‍ന്നത്. 283 ബ്ലോക്ക് പ്രതിനിധികളും മുതിര്‍ന്ന നേതാക്കളും പാര്‍ലമെന്ററി പാര്‍ട്ടി പ്രതിനിധികളും അടക്കം 315 അംഗങ്ങളാണുള്ളത്.
മത്സരം ഇല്ലാത്തതിനാല്‍ കെ സുധാകരന്‍ കെപിസിസി അധ്യക്ഷനായി തുടരും. സുധാകരന്‍ തുടരുന്ന കാര്യത്തില്‍ ഗ്രൂപ്പുകള്‍ തമ്മില്‍ തീരുമാനമായിരുന്നു. അതേസമയം, എഐസിസി അംഗങ്ങളെയും സോണിയാ ഗാന്ധിയായിരിക്കും തെരഞ്ഞെടുക്കുക.
