മലയാളത്തിലെ അറിയപ്പെടുന്ന നിർമാതാവാണ് വിജയ് ബാബു. ഇപ്പോഴിതാ ഇദ്ദേഹം നിർമ്മിക്കുന്ന പുതിയ സിനിമയുടെ ചിത്രീകരണം ആരംഭിച്ചിരിക്കുകയാണ്. ഫ്രൈഡേ ഫിലിംസ് ബാനറിൽ വിജയ് ബാബു നിർമ്മിക്കുന്ന സിനിമയുടെ ചിത്രീകരണം പയ്യന്നൂരിൽ ആണ് ആരംഭിച്ചിരിക്കുന്നത്. ഇതുവരെ ഫ്രൈഡേ ഫിലിംസ് ബാനറിൽ ഇദ്ദേഹം നിർമ്മിച്ച 18 ചിത്രങ്ങളിൽ 14 എണ്ണത്തിന്റെയും സംവിധായകർ പുതുമുഖങ്ങൾ ആയിരുന്നു. ഇപ്പോൾ 19 ആമത്തെ ചിത്രം ചെയ്യുമ്പോഴും വിജയ് ബാബു ആ പതിവ് തെറ്റിക്കുന്നില്ല.
ഇദ്ദേഹം നിർമ്മിക്കുന്ന പത്തൊൻപതാമത്തെ ചിത്രം നവാഗതനായ ആദിത്യൻ ചന്ദ്രശേഖർ ആണ് സംവിധാനം ചെയ്യുന്നത്. ഹൃദയം എന്ന സൂപ്പർഹിറ്റ് ചിത്രത്തിലെ ജോ എന്ന കഥാപാത്രത്തെ അവതരിപ്പിച്ച ശ്രദ്ധ നേടിയ നടൻ കൂടിയാണ് ഇദ്ദേഹം. ആവറേജ് അമ്പിളി എന്ന വെബ് സീരീസ് ആദിത്യൻ തന്നെ തിരക്കഥ രചിച്ച സംവിധാനം ചെയ്തതാണ്. ഈ സീരീസ് ഏറെ ശ്രദ്ധിക്കപ്പെട്ടിരുന്നു.
ഒരു കോമഡി ചിത്രമാണ് അണിയറയിൽ ഒരുങ്ങുന്നത് എന്നാണ് സൂചന. ഉത്തരം മലബാർ ഗ്രാമീണ പശ്ചാത്തലത്തിലാണ് ഈ ചിത്രം ഒരുങ്ങുന്നത്. സുരാജ് വെഞ്ഞാറമൂട്, ബേസിൽ ജോസഫ്, സൈജു കുറുപ്പ് എന്നിവരാണ് ചിത്രത്തിൽ കേന്ദ്ര കഥാപാത്രങ്ങളെ അവതരിപ്പിക്കുന്നത്. ചിത്രത്തിൽ നായികയായി എത്തുന്നത് നിരഞ്ജന അനൂപ് ആണ്. തൻവീർ ചിത്രത്തിൽ ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്.
ഇതുവരെയും ചിത്രത്തിനു പേരിട്ടിട്ടില്ല. ഏതാണ്ട് 25 ഓളം പുതുമുഖങ്ങൾ ചിത്രത്തിൽ വേഷമിടുന്നുണ്ട്. സംവിധായകൻ ആദിത്യൻ ചന്ദ്രശേഖരനും അർജുൻ നാരായണനും, ചേർന്നാണ് ചിത്രത്തിന് തിരക്കഥ രചിച്ചിരിക്കുന്നത്. നാട്ടുമ്പുറത്തുള്ള കുറച്ച് വ്യക്തികളുടെ കഥയാണ് ചിത്രം പറയുന്നത്.
