കൊട്ടാരക്കരയില്‍ വൈദ്യ പരിശോധനയ്‌ക്കെത്തിച്ച പ്രതിയുടെ ആക്രമണത്തില്‍ യുവ ഡോക്ടര്‍ കൊല്ലപ്പെട്ട വാര്‍ത്ത ഞെട്ടലുണ്ടാക്കുന്നതാണ്.വൈദ്യ പരിശോധനയ്ക്കായി താലൂക്ക് ആശുപത്രിയിലെത്തിച്ച സ്‌കൂള്‍ അധ്യാപകന്റെ കുത്തേറ്റ് കൊട്ടാരക്കര താലൂക്ക് ആശുപത്രിയിലെ ഹൗസ് സര്‍ജന്‍ കോട്ടയം മാഞ്ഞൂര്‍ സ്വദേശിനി ഡോ. വന്ദന (22) ആണ് മരിച്ചത്.
ഡോക്ടര്‍ വന്ദനയുടെ മരണ വാര്‍ത്തയ്ക്ക് താഴെ വ്യാപകമായി പ്രചരിച്ച ഒരു ന്യൂസ് പേപ്പര്‍ കട്ടിങ് ആയിരുന്നു ‘പ്രതിയെ ഡോക്ടര്‍ വൈദ്യപരിശോധന നടത്തുമ്പോള്‍ പോലീസ് അടുത്ത് വേണ്ട-എന്ന വാര്‍ത്ത. പഴയൊരു വാര്‍ത്തയുടെ പേപ്പര്‍ കട്ടിങ് വന്ദനയുടെ മരണവാര്‍ത്തയ്ക്ക് താഴെ വ്യാപകമായി പ്രചരിച്ചിരുന്നു.
പ്രതിയെ പരിശോധിക്കുമ്പോള്‍ പോലീസ് അടുത്ത് വേണ്ടെന്ന് സര്‍ക്കാരിനെ കൊണ്ട് ഉത്തരവിറക്കാന്‍ ഒരു ഡോക്ടര്‍ നടത്തിയ നിയമപോരാട്ടത്തിന് ഒടുവിലായിരുന്നു ഇങ്ങനെ ഒരു ഉത്തരവ് സര്‍ക്കാര്‍ ഇറക്കിയത്.മലപ്പുറം ജില്ലയിലെ താനാളൂര്‍ കുടുംബാരോഗ്യ കേന്ദ്രത്തിലെ അസിസ്റ്റന്റ് സര്‍ജന്‍ ഡോ. പ്രതിഭയാണ് ആ നിയമപോരാട്ടം നടത്തിയത്. എന്നാല്‍ വന്ദനയുടെ മരണത്തിന് കാരണമായത് ഡോക്ടറുടെ ഈ ഉത്തരവാണ് എന്ന രീതിയിലായിരുന്നു സോഷ്യല്‍ മീഡിയയില്‍ എത്തിയ പ്രചരണം.
വന്ദന ദാസ് എന്ന ഡോക്ടറുടെ ദാരുണമായ കൊലപാതകത്തില്‍ പോലീസിന്റെ നിഷ്‌ക്രിയത്വം മറച്ചുവെയ്ക്കാന്‍ വേണ്ടി ചിലര്‍ ബോധപൂര്‍വ്വം ഈ പേപ്പര്‍ കട്ടിങ് പ്രചരിപ്പിക്കുകയാണ് എന്ന് വേണം മനസ്സിലാക്കാന്‍.ഡോക്ടര്‍ പ്രതിഭ ഇത്തരത്തില്‍ ഒരു നിയമ പോരാട്ടം നടത്താന്‍ വ്യക്തമായ കാരണമുണ്ട് എന്നാണ് സര്‍ക്കാര്‍ ഡോക്ടര്‍മാരുടെ സംഘടനയായ കെജിഎംഒഎ വിശദീകരിക്കുന്നത്.
പ്രതിയെ വൈദ്യപരിശോധന നടത്തുമ്പോള്‍ പോലീസ് മര്‍ദിച്ചോ എന്നതടക്കമുള്ള കാര്യങ്ങളും, പ്രതിക്ക് ഏതെങ്കിലും തരത്തിലുള്ള പരുക്ക് ഉണ്ടെങ്കില്‍ അത് എങ്ങനെയുണ്ടായി എന്നൊക്കെ പരിശോധിച്ച് ഡോക്ടറുടെ റിപ്പോര്‍ട്ടില്‍ രേഖപ്പെടുത്തേണ്ടതായുമുണ്ട്.
അത് പോലീസ് സാന്നിധ്യത്തില്‍ സാധിക്കാതെ വരുന്ന സാഹചര്യത്തിലായിരുന്നു ഒരു ഡോക്ടര്‍ തന്നെ നിയമപോരാട്ടത്തിന് ഇറങ്ങിയത്.അപ്പോഴും ഡോക്ടറും പ്രതിയും തമ്മിലുള്ള സംസാരം കേള്‍ക്കാത്ത ദൂരത്തില്‍, പ്രതി രക്ഷപ്പെടാന്‍ സാധ്യതയില്ലാത്ത തരത്തില്‍ പോലീസ് സുരക്ഷ ഉണ്ടാകണമെന്ന് തന്നെയാണ് ചട്ടം.
പോലീസ് അടുത്തുനില്‍ക്കുമ്പോള്‍ പ്രതിയ്ക്ക് ഡോക്ടറോട് സ്വതന്ത്രമായി സംസാരിക്കാനുള്ള സാഹചര്യം ഉണ്ടാവാറില്ല. പ്രതിക്ക് പോലീസിന്റെ കൈയില്‍നിന്ന് മര്‍ദ്ദനമേറ്റെങ്കില്‍ അക്കാര്യം പറയാന്‍ പോലും പോലീസിന്റെ സാന്നിധ്യം തടസ്സമാകും. ഇത് ഒഴിവാക്കാനാണ്, അല്ലാതെ സുരക്ഷ വേണ്ടെന്ന നിലയിലല്ല, ഈ ഉത്തരവിന് വേണ്ടി ഒരു ഡോക്ടര്‍ നിയമ പോരാട്ടത്തിന് ഇറങ്ങിയത്- എന്നാണ് കെജിഎംഒഎ സംസ്ഥാന സെക്രട്ടറി ഡോക്ടര്‍ പി കെ സുനില്‍ പറയുന്നത്.
ഉത്തരവ് നേടിയ സാഹചര്യവും യുവ ഡോക്ടര്‍ കൊല്ലപ്പെട്ട സാഹചര്യവും രണ്ടാണ്. ഈ രണ്ട് സാഹചര്യങ്ങളെ കൂട്ടിക്കുഴക്കരുതെന്നും ഡോക്ടര്‍മാരുടെ സുരക്ഷ ഉറപ്പാക്കേണ്ടത് സര്‍ക്കാരിന്റെ ഉത്തരവാദിത്വമാണെന്നും കെജിഎംഒഎ പ്രതികരിച്ചു. ഈ ഉത്തരവിന്റെ പശ്ചാത്തലം അറിയാതെയാണ് പലരും പഴയ പേപ്പര്‍ കട്ടിങ് സോഷ്യല്‍ മീഡിയയില്‍ പങ്കുവയ്ക്കുന്നത്.
