പ്രവർത്തിക്കുന്ന ടിവി,കമ്പ്യൂട്ടർ, സ്മാർട്ട് മൊബൈൽ ഫോണുകൾ, എന്നിവ സംഭാവന ചെയ്ത് കഴിയാവുന്ന സുമനസ്സുകളും സ്ഥാപനങ്ങളും വിദ്യാർത്ഥികൾക്ക് ഓൺലൈൻ പഠന സൗകര്യമൊരുക്കുന്നതിന്റെ ഭാഗമാകണമെന്ന് മേയർ കെ.ശ്രീകുമാർ അഭ്യർത്ഥിച്ചു.
സന്നദ്ധരാവുന്നവർക്ക് ഇവ നഗരസഭയിലെത്തിക്കാം. വിളിച്ചറിയിച്ചാൽ നഗരസഭാ വോളന്റിയർമാർ വന്ന് ശേഖരിക്കുകയും ചെയ്യും.
ഓൺലൈൻ സൗകര്യങ്ങൾ ഇല്ലാത്ത കുട്ടികൾക്കായി പ്രത്യേകിച്ച് തീരദേശ വാർഡുകളിലും , കോളനികൾ കേന്ദ്രീകരിച്ചും ടി.വി , കമ്പ്യൂട്ടർ , ഇന്റർനെറ്റ് എന്നീ സംവിധാനങ്ങളാണ് നഗരസഭയുടെ നേതൃത്വത്തിൽ ഒരുക്കുന്നത് .
ഇത്തരം പഠന കേന്ദ്രങ്ങൾ സമീപത്തുള്ള ഹെഡ്മാസ്റ്റർമാരുടെ മേൽ നോട്ടത്തിൽ കൃത്യമായി വിലയിരുത്തുകയും ചെയ്യും . വിദ്യാർത്ഥികൾക്ക് കൃത്യമായി ക്ലാസ്സുകൾ ലഭ്യമാകുന്നുണ്ടോ എന്ന് സ്കൂളുകളിലെ ടീച്ചർമാരുടെ സേവനം ഉപയോഗപ്പെടുത്തി ഉറപ്പു വരുത്തും.
നാലായിരത്തിലധികം കുട്ടികൾക്കാണ് നഗരസഭയുടെ നേതൃത്വത്തിൽ ഈ രീതിയിൽ സൗകര്യമൊരുക്കുക . അതോടൊപ്പം തന്നെ നഗരപരിധിയുടെ 3426 ഭിന്നശേഷിക്കാരായ വിദ്യാർത്ഥികളിൽ ഓൺലൈൻ പഠനസൗകര്യമില്ലാത്ത വിദ്യാർത്ഥികൾക്ക് പ്രത്യേക ഓൺലൈൻ പഠന കേന്ദ്രങ്ങളും നഗരസഭയുടെ നേതൃത്വത്തിൽ സജ്ജമാക്കും .
ഇവർക്ക് നൽകുന്ന ക്ലാസ്സുകളുടെ സിലബസ്സുകൾ ഭിന്നശേഷിക്കാരായ വിദ്യാർത്ഥികളുടെ പഠന ക്രമത്തിലാക്കി വീഡിയോകളിലൂടെ പ്രാദേശിക ചാനലുകൾ വഴി സംപ്രേക്ഷണം ചെയ്യാനാണ് നഗരസഭയുടെ പദ്ധതി . എസ്.എസ്.കെയുടെ റിസോഴ്സ് അദ്ധ്യാപകരുടെ സേവനം പ്രയോജനപ്പെടുത്തിയാണ് ഈ സംവിധാനം നടപ്പിലാക്കുന്നത് .
സഹായിക്കാൻ സന്നദ്ധരായവർ വിളിക്കേണ്ട നമ്പറുകൾ
9496434409,9496434410
