ഓസ്‌ട്രേലിയയ്‌ക്കെതിരായ ടി20 പരമ്പരയില്‍ ഇന്ത്യന്‍ ഫാസ്റ്റ് ബൗളര്‍ മുഹമ്മദ് ഷമി കളിക്കില്ല. കൊവിഡ് ബാധിച്ചതിനെ തുടര്‍ന്നാണ് ഷമിയെ ഒഴിവാക്കിയത്. പകരം ഉമേഷ് യാദവ് ടീമില്‍ ഇടംപിടിച്ചു. സെപ്റ്റംബര്‍ 20ന് മൊഹാലിയിലാണ് പരമ്പരയിലെ ആദ്യ മത്സരം നടക്കുന്നത്.
പരുക്കിനെ തുടര്‍ന്ന് കളിയില്‍ നിന്ന് മാറി നില്‍ക്കുകയാണ് ഉമേഷ്. ഫിറ്റ്നസ് തെളിയിച്ച ശേഷമാകും താരത്തെ ടീമില്‍ ഉള്‍പ്പെടുത്തുക. ഷമിക്ക് കൊവിഡ് സ്ഥിരീകരിച്ചുവെങ്കിലും ആശങ്കപ്പെടേണ്ട സാഹചര്യമില്ലെന്നാണ് ബി.സി.സി.ഐ വിശദീകരിക്കുന്നത്. ചെറിയ ലക്ഷണങ്ങള്‍ മാത്രമാണ് ഷമിക്കുള്ളത്. നിലവില്‍ താരം ഐസൊലേഷനിലാണെന്നും നെഗറ്റീവായതിന് ശേഷം ടീമിനൊപ്പം ചേരുമെന്നും ബി.സി.സി.ഐ അറിയിച്ചു.
പരമ്പര തുടങ്ങാന്‍ ഇനിയും 10 ദിവസം ബാക്കിയുണ്ട്. ദക്ഷിണാഫ്രിക്കക്കെതിരായ പരമ്പരക്ക് മുമ്പായി ഷമി ആരോഗ്യക്ഷമത വീണ്ടെടുക്കുമെന്നാണ് പ്രതീക്ഷിക്കുന്നതെന്ന് ബി.സി.സി.ഐ വക്താവ് അറിയിച്ചു.
