ആദിവാസി മേഖലകളിലെ ഗോത്രവർഗ്ഗ കുടുംബങ്ങൾക്ക് തൊഴിലവസരങ്ങൾ സൃഷ്ടിക്കാൻ എൽഡിഎഫ് സർക്കാർ ആവിഷ്കരിച്ച നൂതനമായ പദ്ധതിയാണ് കേരള ട്രൈബൽ പ്ലസ്. തൊഴിലുറപ്പ് പദ്ധതിയുമായി ബന്ധപ്പെട്ട് കിടക്കുന്ന പദ്ധതിയാണിത്. മഹാത്മാഗാന്ധി തൊഴിലുറപ്പ് പദ്ധതി പ്രകാരം പരമാവധി 100 തൊഴിൽ ദിനങ്ങളാണ് ഓരോ കുടുംബങ്ങൾക്കും ലഭിക്കുന്നത്. എന്നാൽ പട്ടിക വർഗ വിഭാഗത്തിൽപ്പെട്ട കുടുംബങ്ങൾക്ക് അത് 200 ദിവസമാക്കി നൽകുകയാണ് ട്രൈബൽ പ്ലസ് പദ്ധതിയുടെ ലക്ഷ്യം.
ഒരു വർഷം 100 തൊഴിലുറപ്പ് ദിനം പൂർത്തിയാക്കിയ പട്ടിക വർഗ്ഗ കുടുംബങ്ങൾക്കാണ് 100 ദിവസം കൂടി തൊഴിൽ നൽകുന്നത്. സംസ്ഥാന പട്ടിക വർഗ്ഗ വകുപ്പിന്റെ ഫണ്ട് ഉപയോഗിച്ചാണ് ഈ അധിക ദിവസ തൊഴിൽ നൽകുക. 2017ലാണ് ഈ പദ്ധതിയ്ക്ക് തുടക്കമാകുന്നത്. ആ വർഷം 30,05,299 തൊഴിൽ ദിനങ്ങളാണ് സൃഷ്ഠിച്ചത്. അടുത്ത സാമ്പത്തിക വർഷം അത് 54,19,122 തൊഴിൽ ദിനങ്ങളായി ഉയർന്നു. 20,000ത്തിലധികം കുടുംബങ്ങൾക്കാണ് നൂറു ദിവസത്തിനു മുകളിൽ തൊഴിൽ ലഭിച്ചത്.
അധികമായി 100 തൊഴിൽ ദിവസം നൽകുന്നതിന് പുറമെ മറ്റൊരു ആശയം കൂടി കേരളത്തിൽ എൽഡിഎഫ് സർക്കാർ നടപ്പിലാക്കി. സാമൂഹിക അവസ്ഥ കാരണം ജോലി ചെയ്യുന്ന ദിവസം തന്നെ വേതനം ലഭിക്കേണ്ട സാഹചര്യമാണ് ആദിവാസി മേഖലകളിലുള്ളത്. വേതനം ദിവസേന ലഭിക്കാത്തതിന്റെ പേരിൽ പലപ്പോഴും തൊഴിലുറപ്പിലേക്ക് വരാൻ ഗോത്രവർഗ്ഗ കുടുംബങ്ങൾ മടി കാണിക്കുന്നതായി സർക്കാരിന്റെ ശ്രദ്ധയിൽപ്പെട്ടു.
തുടർന്ന്, പരീക്ഷണാടിസ്ഥാനത്തിൽ തൊഴിലുറപ്പ് പദ്ധതിയിൽ ജോലിചെയ്യുന്ന പട്ടിക വർഗ്ഗ വിഭാഗത്തിൽപ്പെട്ട കുടുംബങ്ങൾക്ക് എല്ലാ ആഴ്ചയും വേതനം നൽകാനായി തീരുമാനിച്ചു. ഇതിനായി പ്രത്യേക റിവോൾവിംഗ് ഫണ്ട് തയ്യാറാക്കുകയും ചെയ്തു. തൊഴിലുറപ്പ് പദ്ധതിയുടെ തുക ലഭ്യമായതിന് ശേഷം റിവോൾവിംഗ് ഫണ്ട് തിരിച്ചടയ്ക്കുന്ന രീതിയിലാണ് ഈ പദ്ധതി ആവിഷ്കരിച്ചത്.
പാലക്കാട് ജില്ലയിലെ അട്ടപ്പാടി, ഷോളയൂർ, പുതൂർ പഞ്ചായത്തുകളിലും വയനാട് ജില്ലയിലെ പനമരം, മുട്ടിൽ, പുൽപ്പള്ളി പഞ്ചായത്തുകളിലുമാണ് ഈ രീതി നടപ്പിലാക്കിയത്. പട്ടിക വർഗ വകുപ്പ് പ്രത്യേകമായി അനുവദിച്ച റിവോൾവിംഗ് ഫണ്ട് (11 കോടി രൂപ) കുടുംബശ്രീയിലൂടെയാണ് വിതരണം ചെയ്യുന്നത്. പട്ടിക വർഗ്ഗ മേഖലയിൽ, തൊഴിലുറപ്പ് പദ്ധതിയുടെ പ്രാതിനിധ്യം വർദ്ധിപ്പിക്കാൻ ഇതിലൂടെയായി.
മഹാത്മാഗാന്ധി തൊഴിലുറപ്പ് പദ്ധതിക്കും അയ്യങ്കാളി തൊഴിലുറപ്പ് പദ്ധതിക്കും ഒപ്പം ട്രൈബൽ പ്ലസ് പദ്ധതിയും കൂടി നടപ്പിലാക്കിയതോടെ തൊഴിലുറപ്പ് പദ്ധതിയെ വിശാലമായ തലത്തിലേക്ക് ഉയർത്താൻ കേരളത്തിനായി. സമൂഹത്തിലെ എല്ലാ വിഭാഗങ്ങളെയും ഉൾക്കൊള്ളുന്ന തരത്തിലേക്ക് പദ്ധതി മാറി.
സാമൂഹ്യ പിന്നാക്കവസ്ഥയിലുള്ള ജനവിഭാഗങ്ങളുടെ സുരക്ഷയും ക്ഷേമവും ഉറപ്പാക്കാൻ സർക്കാർ സ്വീകരിക്കുന്ന സമഗ്ര നടപടികളാണ് മറ്റെല്ലാ മേഖലകളിലുമെന്നപോലെ തൊഴിലുറപ്പ് പദ്ധതിയിലും ‘കേരള മോഡൽ’ സൃഷ്ടിച്ചത്.
#ഉറപ്പാണ്LDF