ജസ്റ്റിസ് യു.യു ലളിത് സുപ്രിംകോടതിയുടെ അടുത്ത ചീഫ് ജസ്റ്റിസാകും. നിലവിലെ ചീഫ് ജസ്റ്റിസ് എന്‍. വി രമണ ഓഗസ്റ്റ് 26 ന് വിരമിക്കുന്നതിന്റെ പശ്ചാത്തലത്തിലാണ് ജസ്റ്റിസ് ലളിതിന്റെ നിയമനം. ചീഫ് ജസ്റ്റിസ് എന്‍.വി രമണയാണ് ജസ്റ്റിസ് യു.യു ലളിതിന്റെ പേര് നിര്‍ദേശിച്ചത്. നവംബര്‍ എട്ടിനു വിരമിക്കുന്ന ലളിതിനു മൂന്നു മാസത്തെ കാലാവധിയാണുള്ളത്. സുപ്രിംകോടതിയുടെ നാല്‍പ്പത്തിയൊന്‍പതാമത് ചീഫ് ജസ്റ്റിസായിരിക്കും യു.യു ലളിത്.
‘മുത്തലാഖ്’ വഴിയുള്ള വിവാഹമോചനം നിയമവിരുദ്ധമാണെന്ന് വിധിച്ച ബെഞ്ചിലെ അംഗമാണ് യു.യു ലളിത്. സുപ്രിംകോടതി ജഡ്ജിയായി ബാറില്‍ നിന്ന് നേരിട്ടു നിയമിതനായ ജസ്റ്റിസ് എസ്. എം സിക്രി കഴിഞ്ഞാല്‍ രണ്ടാമത്തെ ചീഫ് ജസ്റ്റിസാകും ലളിത്.
1957 ല്‍ ജനിച്ച ജസ്റ്റിസ് ലളിത്, 1983 ല്‍ ബോംബെ ഹൈക്കോടതിയിലാണ് അഭിഭാഷകനായി എന്റോള്‍ ചെയ്തത്. 2ജി കേസിന്റെ വിചാരണയില്‍ സിബിഐയുടെ സ്പെഷല്‍ പബ്ലിക്ക് പ്രോസിക്യൂട്ടറായി ഹാജരായിരുന്നു. 2014ലാണ് സുപ്രിംകോടതി ജഡ്ജിയായി നിയമിതനായത്.
