കേരളത്തിൽ തിരുവനന്തപുരം, തൃശൂര്‍ എന്നീ മണ്ഡലങ്ങളിലാണ് ബിജെപിക്ക് വലിയ പ്രതീക്ഷ ഉണ്ട്.രണ്ടിടത്തും ശക്തമായ ത്രികോണ മല്‍സരമാണ് മറ്റു പാര്‍ട്ടികളും സമ്മതിക്കുന്നു. എന്നാല്‍ ആറ്റിങ്ങല്‍, പത്തനംതിട്ട, ആലപ്പുഴ, പാലക്കാട് എന്നിവിടങ്ങളിലും ശക്തമായ മല്‍സരം നടക്കുമെന്ന പ്രതീക്ഷ ബിജെപിക്കുണ്ട്. ഇതിനിടെയാണ് മെട്രോമാന്‍ ഇ ശ്രീധരന്‍ ഇന്ന് മാധ്യമങ്ങളോട് തന്റെ പ്രതീക്ഷകള്‍ പങ്കുവച്ചത്.എഴോ എട്ടോ സീറ്റുകളില്‍ ജയിക്കുമെന്ന പ്രതീക്ഷ പ്രകടിപ്പിച്ചു. പൊന്നാനിയിലും ഇത്തവണ ജയിക്കുമെന്നാണ് മീഡിയവണ്ണിനോട് അദ്ദേഹം പ്രതികരിച്ചത്. പ്രധാനമന്ത്രിയുടെ വിവാദമായ രാജസ്ഥാന്‍ പ്രസംഗത്തെയും ഇ ശ്രീധരന്‍ ന്യായീകരിച്ചു. പൊന്നാനിയിലെ എന്‍ഡിഎ സ്ഥാനാര്‍ഥിയുടെ വികസന രേഖ പ്രകാശനത്തിന് എത്തിയതായിരുന്നു ശ്രീധരന്‍.
അദ്ദേഹത്തിന്റെ വാക്കുകൾ ഇതാണ്,’എന്‍ഡിഎയെ സംബന്ധിച്ചിടത്തോളം ഇത്തവണത്തെ ലോക്‌സഭാ തിരഞ്ഞെടുപ്പ് വളരെ പ്രധാനപ്പെട്ടതാണ്. കേരളത്തില്‍ ഇതുവരെ അക്കൗണ്ട് തുറക്കാന്‍ സാധിച്ചിരുന്നില്ല. ഇത്തവണ നിരവധി സ്ഥാനാര്‍ഥികള്‍ ജയിക്കുമെന്ന ധൈര്യമുണ്ട്. ഏഴോ, എട്ടോ സീറ്റില്‍ ബിജെപി ജയിക്കുമെന്നാണ് വിശ്വാസം. മോദി ഗ്യാരണ്ടി എന്നാല്‍ ഗ്യാരണ്ടിയാണ്. എല്ലാ വികസനത്തിനും ഫണ്ട് നല്‍കുന്നത് കേന്ദ്രമാണെന്ന് എല്ലാവര്‍ക്കുമറിയാമെന്നും ശ്രീധരന്‍ പറഞ്ഞു.രാജസ്ഥാനിലെ മോദിയുടെ പ്രസംഗത്തില്‍ മുന്‍ പ്രധാനമന്ത്രിയുടെ വാക്കുകള്‍ അദ്ദേഹം ആവര്‍ത്തിക്കുകയാണ് ചെയ്തത്. കോണ്‍ഗ്രസിന്റെ നിലപാട് ഇതാണ് എന്ന് ജനങ്ങളോട് പറയുകയാണ് മോദി ചെയ്തത്. മോദിയുടെ അഭിപ്രായമല്ല അത്. സിഎഎ ബിജെപിക്ക് തിരിച്ചടിയാകില്ല എന്നും അദ്ദേഹം പറയുന്നുണ്ട്.
