സംസ്ഥാനത്ത് നവമാധ്യമങ്ങള് വഴി മതസ്പര്ധ വളര്ത്തുന്ന പോസ്റ്റുകളുടെ പ്രചരണം കൂടുന്നതായി പൊലീസ്. ഇത്തരം പ്രചാരണം നടത്തുന്നവര്ക്കെതിരെ നടപടി കടുപ്പിക്കാനാണ് പൊലീസിന്റെ തീരുമാനം. പ്രചാരണം നടത്തുന്നവരെ ഉടന് അറസ്റ്റ് ചെയ്യാന് ഡിജിപി ജില്ലാ പൊലീസ് മേധാവികള്ക്ക് നിര്ദേശം നല്കി.
ഒരു മാസത്തിനിടെ 144 കേസുകളാണ് ഈ രീതിയില് രജിസ്റ്റര് ചെയ്തത്. ആലപ്പുഴയില് ആര്എസ്എസ്- എസ്ഡിപിഐ നേതാക്കളുടെ കൊലപാതകത്തിന് ശേഷമാണ് നവമാധ്യമങ്ങള് വഴി മതസ്പര്ധ വളര്ത്തുന്ന പോസ്റ്റുകള് വ്യാപകമായി പ്രചരിച്ചു തുടങ്ങിയത്. സമൂഹത്തില് ഭിന്നത വളര്ത്തുന്ന പോസ്റ്റുകള്ക്ക് പിന്നില് ആരാണെന്ന് കണ്ടെത്താനുള്ള ശ്രമത്തിലാണ് പൊലീസ്. മുന്നറിയിപ്പ് നല്കിയിട്ടും പോസ്റ്റുകള് വീണ്ടും പ്രചരിപ്പിക്കുന്ന സാഹചര്യത്തിലാണ് കര്ശന നടപടികളിലേക്ക് നീങ്ങുന്നത്.
മലപ്പുറത്താണ് ഇത്തരത്തില് ഏറ്റവും കൂടുതല് കേസുകള് രജിസ്റ്റര് ചെയ്തത്. 32 കേസുകള്. 21 പ്രതികളെ അറസ്റ്റ് ചെയ്യുകയും ചെയ്തു. ആലപ്പുഴയില് 16 കേസുകള് രജിസ്റ്റര് ചെയ്തു. ഒരാളെ മാത്രമാണ് അറസ്റ്റ് ചെയ്തത്. എറണാകുളം റൂറലില് 14 കേസുകള് രജിസ്റ്റര് ചെയ്തെങ്കിലും ഒരാളെ മാത്രമേ അറസ്റ്റ് ചെയ്തിട്ടുള്ളൂ. ഈ സാഹചര്യത്തിലാണ് കേസിലുള്പ്പെട്ട എല്ലാ പ്രതികളെ ഉടന് പിടികൂടാനുളള നിര്ദ്ദേശം.
