ഗസ്സ സിറ്റി: ഇസ്രയേല്‍-പാലസ്തീന്‍ യുദ്ധത്തില്‍ പ്രതികരണവുമായി ബ്രസീല്‍ പ്രസിഡന്റ് ലുല ഡാ സില്‍വ. ഇത് യുദ്ധമല്ല, വംശഹത്യയാണ്, നിരപരാധികളായ ആയിരക്കണക്കിന് കുഞ്ഞുങ്ങളെയാണ് കൊന്നൊടുക്കുന്നത് എന്നും ബ്രസീല്‍ പ്രസിഡന്റ് പറഞ്ഞു.
അതേസമയം പാലസ്തീനെ കുറിച്ചാണോ ഇസ്രയേലിനെ കുറിച്ചാണോ ബ്രസീല്‍ പ്രസിഡന്റിന്റെ വാക്കുകള്‍ എന്ന കാര്യത്തില്‍ വ്യക്തതയില്ല. ഒരു രാജ്യത്തിന്റെയും പേര് പരാമര്‍ശിക്കാതെയാണ് ബ്രസീല്‍ പ്രസിഡന്റിന്റെ വാക്കുകള്‍.
ഈജിപ്ത് അതിര്‍ത്തിയില്‍ കുടുങ്ങിക്കിടക്കുന്ന ബ്രസീലുകാരെ തിരിച്ചെത്തിക്കാന്‍ ശ്രമം തുടരുന്നതായും അദ്ദേഹം അറിയിച്ചു.
അതേസമയം, യുദ്ധം രണ്ടാം ഘട്ടത്തിലേക്ക് കടക്കുന്നുവെന്നാണ് ഇസ്രായേലിന്റെ അവകാശവാദം. ഇസ്രായേല്‍ സൈനിക ടാങ്കുകള്‍ വടക്കന്‍
ഗസ്സയില്‍ കടന്നു. ഹമാസ് കേന്ദ്രങ്ങള്‍ ആക്രമിച്ചെന്നും ഹമാസ് പോരാളികളെ വധിച്ചെന്നും ഇസ്രായേല്‍ സൈന്യം പറഞ്ഞു.
വെസ്റ്റ് ബാങ്കില്‍ ഡസന്‍ കണക്കിന് പ്രവര്‍ത്തരെ ഇസ്രായേല്‍ അറസ്റ്റ് ചെയ്‌തെന്ന് ഹമാസ് അറിയിച്ചു. അതേസമയം അധിനിവേശ സൈന്യം പിന്‍വാങ്ങുന്നതുവരെ യുദ്ധം തുടരുമെന്നുമാണ് ഹമാസ് അറിയിക്കുന്നത്.
