കോണ്ഗ്രസ് അധ്യക്ഷ സ്ഥാനത്തേക്ക് മത്സരിക്കുന്ന കാര്യത്തില് വ്യക്ത വരുത്തി രാജസ്ഥാന് മുഖ്യമന്ത്രി അശോക് ഗെലോട്ട്. മത്സരിക്കാന് തീരുമാനിച്ചുവെന്നും നാമനിര്ദേശ പത്രിക ഉടന് നല്കുമെന്നും അശോക് ഗെലോട്ട് അറിയിച്ചു. ഗാന്ധി കുടുംബത്തില് നിന്ന് ആരും മത്സരത്തിനുണ്ടാകില്ലെന്നും അശോക് ഗെലോട്ട് വിശദീകരിച്ചു. ഇതോടെ ഗാന്ധി കുടുംബത്തിന്റെ പിന്തുണയുള്ള ഔദ്യോഗിക സ്ഥാനാര്ത്ഥിയായി ഗെലോട്ട് മത്സരിക്കുമെന്ന് ഉറപ്പായി.
രാജസ്ഥാന് മുഖ്യമന്ത്രി അശോക് ഗെലോട്ട് കോണ്ഗ്രസ് അധ്യക്ഷനായി തെരഞ്ഞെടുക്കപ്പെട്ടാല് മുഖ്യമന്ത്രി സ്ഥാനത്തേക്ക് യുവനേതാവ് സച്ചിന് പൈലറ്റിനെ ഹൈക്കമാന്ഡ് പിന്തുണച്ചേക്കും. രാജസ്ഥാന് മുഖ്യമന്ത്രി പദവും കോണ്ഗ്രസ് അധ്യക്ഷ പദവും ഒരുമിച്ച് വഹിക്കാമെന്ന ഗെലോട്ടിന്റെ നിര്ദേശം ഹൈക്കമാന്ഡ് തള്ളിയിരുന്നു. മുഖ്യമന്ത്രി സ്ഥാനത്തേക്ക് സച്ചിന് പൈലറ്റ് എത്തുന്നത് ഗെലോട്ടിന് താത്പര്യമുള്ള കാര്യമല്ല. മുഖ്യമന്ത്രിയെ താന് നിര്ദേശിക്കാമെന്ന ഗെലോട്ടിന്റെ ആവശ്യവും ഹൈക്കമാന്ഡ് പരിഗണിച്ചേക്കില്ലെന്നാണ് സൂചന
ഗെലോട്ട് സ്ഥാനമൊഴിയുന്ന സാഹചര്യത്തില് സച്ചിന് പൈലറ്റിനെ അവഗണിച്ചാല് സംസ്ഥാനത്ത് പാര്ട്ടിക്ക് കടുത്ത തിരിച്ചടി നേരിടേണ്ടി വരുമെന്നും ഹൈക്കമാന്ഡ് കരുതുന്നു. രാജസ്ഥാന് കോണ്ഗ്രസില് പ്രബലമായ രണ്ട് വിഭാഗമാണ് ഗെലോട്ടും സച്ചിന് പൈലറ്റും. മുഖ്യമന്ത്രി സ്ഥാനമുന്നയിച്ച് സച്ചിന് പൈലറ്റ് നേരത്തെ വിമത നീക്കം നടത്തിയിരുന്നു.