രാജ്യത്തെ ചലച്ചിത്ര മേഖലയ്ക്കുള്ള പരമോന്നത ബഹുമതിയായ ദാദാ സാഹേബ് ഫാല്‍ക്കെ പുരസ്‌കാരം മുതിര്‍ന്ന നടി ആശാ പരേഖിന്. കേന്ദ്ര വാര്‍ത്താ വിതരണമന്ത്രി അനുരാഗ് താക്കൂറാണ് പുരസ്‌കാരം പ്രഖ്യാപിച്ചത്. വെള്ളിയാഴ്ച ഡല്‍ഹിയില്‍ നടക്കുന്ന ചടങ്ങില്‍ രാഷ്ട്രപതി പുരസ്‌കാരം വിതരണം ചെയ്യും. രണ്ട് വര്‍ഷത്തിന് ശേഷമാണ് രാഷ്ട്രപതി പുരസ്‌കാരം വിതരണം ചെയ്യുന്നത്.
അഭിനയത്തിന് പുറമെ സംവിധായികയും നിര്‍മാതാവുമായിരുന്നു ആശാ പരേഖ്. 1959മുതല്‍ 1973 വരെയുള്ള കാലങ്ങളില്‍ ഏറ്റവുമധികം സൂപ്പര്‍ഹിറ്റുകളില്‍ അഭിനയിച്ചിട്ടുള്ള ഹിന്ദി ചലച്ചിത്ര നടിയാണ് ആശ. ഇന്ത്യന്‍ സിനിമയിലെ ആദ്യ ലേഡി സൂപ്പര്‍സ്റ്റാര്‍ എന്നാണ് ആശ അറിയപ്പെടുന്നത്.1952ല്‍ ബിമല്‍ റോയ് സംവിധാനം ചെയ്ത ‘മാ’ എന്ന സിനിമയില്‍ ബാലതാരമായാണ് ആശാ പരേഖ് അഭിനയ രംഗത്തേക്ക് എത്തുന്നത്.
ആദ്യ ചിത്രത്തിന് ശേഷം വിദ്യാഭ്യാസത്തിനായി ആശ ഇടവേളയെടുത്തു. നാസിര്‍ ഹുസൈന്റെ ‘ദില്‍ ദേകെ ദേഖോ’ എന്ന ചിത്രത്തില്‍ നായികയായി 1959ല്‍ ആശാ പരേഖ് സിനിമയിലേക്ക് തിരിച്ചെത്തി. തുടര്‍ന്ന് ‘ജബ് പ്യാര്‍ കിസി സെ ഹോതാ ഹേ’, ‘പ്യാര്‍ കാ മൗസം’, ‘കാരവന്‍’, ‘ഫിര്‍ വൊഹി ദില്‍ ലയാ ഹൂ’, ‘ചിരാഗ്’ തുടങ്ങി ഒട്ടേറെ സിനിമകളില്‍ അഭിനയിച്ചു. 1992 ല്‍ രാജ്യം പത്മശ്രീ നല്‍കി ആദരിച്ചു.
