മലയാളികളുടെ പ്രിയതാരം ടൊവിനോ ഇന്ന് മുപ്പത്തിയൊന്നാം പിറന്നാളാഘോഷിക്കുകയാണ്. തലതൊട്ടപ്പന്മാരില്ലാതെ മലയാളസിനിമാലോകത്തേക്ക് എത്തി ചുരുങ്ങിയ സമയം കൊണ്ട് തൻ്റേതായ വ്യക്തിമുദ്ര പതിപ്പിച്ച താരമാണ് ടൊവിനോ. ചെന്നൈയിൽ കോഗ്നിസെന്‍റ് ടെക്നോളജീസിൽ സോഫ്റ്റ് വെയ‍ർ എഞ്ചിനീയറായി ജോലിചെയ്തിരുന്ന ടൊവിനോ സിനിമയ്ക്കായി ജോലി ഉപേക്ഷിക്കുകയായിരുന്നു.
പിറന്നാൾ ദിനത്തിൽ ടൊവിനോയ്ക്ക് ആശംസകളുമായി രംഗത്തെത്തിയിരിക്കുകയാണ് പതിനെട്ടാംപടിയിലൂടെ ശ്രദ്ധേയനായ നടൻ അക്ഷയ് രാധാകൃഷ്ണൻ. തരംഗം സിനിമയുടെ ഷൂട്ടിങ്ങിന് ടോവിനോ ആലുവയിലെത്തിയപ്പോൾ കാണാൻ ചെന്നതിൻ്റെ അനുഭവം വിശദീകരിക്കുകയാണ് അക്ഷയ്. കൂട്ടുകാരനെയും കൂട്ടിയാണ് കാണാൻ ചെന്നതെന്നും ഒരു ഫ്ലാറ്റിന്റെ ബാൽക്കണിയിൽ നിന്ന് ആരോടൊ സംസാരിച്ചു കൊണ്ടിരുന്ന അദ്ദേഹത്തെ നോക്കി ആഹ്ലാദത്തോടെ കൈകൾ ഉയർത്തി ഉച്ചത്തിൽ “ടോവിനോ ചേട്ടാ എന്ന് വിളിച്ചെന്നും അദ്ദേഹം ഞങ്ങളെ കണ്ടുവെന്നും തിരിച്ച് കൈകാണിച്ചുവെന്നും അക്ഷയ് പറയുന്നു.
ഒരു സെൽഫി എടുത്തോട്ടെന്ന് ചോദിച്ചപ്പൊ കയറി വരാൻ പറഞ്ഞെന്നും ഞങ്ങളെ സിനിമാക്കാർ കയറ്റിവിട്ടില്ലെന്നും അക്ഷയ് കുറിച്ചു. അത് കണ്ട് ടോവിനോച്ചായൻ താഴേക്ക് സ്വയം ഇറങ്ങിവന്നെന്നും ഞങ്ങൾ സെൽഫിയുമെടുത്തെന്നും അക്ഷയ് കുറിച്ചിരിക്കുന്നു. കണ്ടതിൽ വച്ച് എറ്റവും സിമ്പിൾ ആൻ്റ് ഹംപിൾ മാൻ ആണ് അദ്ദേഹമെന്നും അദ്ദേഹത്തിന്റെ കൂടെ അഭിനയിക്കണം എന്നതാണ് തൻ്റെ ആഗ്രഹമെന്നും അത് നടന്നാൽ മതിയാരുന്നു എന്നും അക്ഷയ് തൻ്റെ സോഷ്യൽ മീഡിയയിൽ കുറിച്ചിരിക്കുന്നു. ഹാപ്പി ബര്‍ത്ത്ഡേ ടൊവിനോച്ചായാ എന്നും താരം കുറിച്ചിട്ടുണ്ട്,
