വിചാരണ നേരിടുന്ന കൊലക്കേസ് പ്രതിക്ക് ലോഡ്ജില്‍ കാമുകിക്കൊപ്പം സമയം ചെലവഴിക്കാന്‍ സൗകര്യമൊരുക്കി പൊലീസ്. കര്‍ണാടകയിലെ ധാര്‍വാഡയിലാണ് സംഭവം. കൊലപാതക കേസില്‍ വിചാരണ നേരിടുന്ന ബച്ചാ ഖാനാണ് കാമുകിക്കൊപ്പം ലോഡ്ജില്‍ സമയം ചെലവിടാന്‍ പൊലീസ് അനുവാദം നല്‍കിയത്. സംഭവം പുറത്തറിഞ്ഞതോടെ പൊലീസ് ഉദ്യോഗസ്ഥര്‍ക്കെതിരെ കേസെടുത്തു.
ഇന്ത്യന്‍ എക്‌സ്പ്രസാണ് ഇത് സംബന്ധിച്ച വാര്‍ത്ത റിപ്പോര്‍ട്ട് ചെയ്തത്. സ്വത്ത് തര്‍ക്കത്തിന്റെ പേരില്‍ ഇര്‍ഫാന്‍ എന്നയാളെ കൊലപ്പെടുത്തിയ കേസില്‍ വിചാരണ നേരിടുകയാണ് ബച്ചാ ഖാന്‍. ഇയാളെ ബല്ലാരി പൊലീസ് ധാര്‍വാഡിലെ കോടതിയില്‍ ഹാജരാക്കിയ ശേഷമാണ് കാമുകിയോടൊപ്പം ലോഡ്ജില്‍ താമസിക്കാന്‍ അനുവദിച്ചതെന്നാണ് റിപ്പോര്‍ട്ടില്‍ പറയുന്നത്.
ബംഗളുരു സ്വദേശിയായ ബച്ചാ ഖാന്റെ കാമുകിയാണ് ധാര്‍വാഡയിലെത്തി ലോഡ്ജില്‍ മുറിയെടുത്തത്. എന്നാല്‍ ഇതിനെക്കുറിച്ച് വിദ്യാഗിരി പൊലീസിന് വിവരം ലഭിച്ചു. ഇവര്‍ ലോഡ്ജില്‍ റെയ്ഡ് നടത്തിയപ്പോഴാണ് സംഭവം പുറത്തറിഞ്ഞത്. ഈ സമയത്ത് ഹോട്ടലില്‍ കാവലിലുണ്ടായിരുന്നു പൊലീസുകാര്‍ക്കെതിരെയാണ് കേസെടുത്തിരിക്കുന്നത്.
